Honda Stepwgn SPADA修飾更舒適

本田（Honda）於2015年前推出的新一代Stepwgn，以1.5公升Turbo偈及獨有的「Waku Waku」尾門搶咗不少MPV客，時隔兩年，代理再帶來全新升級版，除了外觀經過修飾外，還新增了後泊鏡及尾排12V電插座，當中的SPADA版更首設可調式車廂LED燈，提供更舒適、便利的駕乘體驗。

Honda Stepwgn SPADA
售價：$339,880

Waku Waku尾門最方便

Serena及Noah今年已先後有新車到港，最近終於輪到本田出手，引進2017版Stepwgn，除咗SPADA版有專屬的原廠包圍外，鬼面罩及LED頭燈都換上新設計，看上去更加醒神。Honda首創的「Waku Waku」尾門亦繼續出現在新Stepwgn上，尾門不但可向上揭起，還可如雪櫃門般拉開，只要車尾與牆身有2呎左右的空間已足以提取物品，甚至可讓後排乘客上落，於日常生活中帶來不少便利。本地市場有好多MPV，歐洲車又好、日本車又好，如果要我揀最User-friendly的車款，毫無疑問是Stepwgn，尤其欣賞後座的收摺設計，輕拉一下椅背的尼龍帶就可收到地台底，唔使親自摺、拉、掛，快捷又方便。

多功能軚環以皮革包裹，SPADA版另設加減波按鍵。	SPADA版的車廂LED燈可調校光暗，發出的光線也較傳統燈泡柔和。	後排加設12V電插座，能夠為冰箱提供電力。
左邊A柱底及側鏡殼都設有反射鏡，駕駛者可清楚見到路壆及行人腳位。	LED頭燈換上新設計，眼神更為銳利。	中排設有兩張大班椅，櫈底另設鞋袋。

增車廂可調式LED燈

為提升駕駛及乘坐體驗，原廠不但為新Stepwgn標配後泊鏡及皮軚環，SPADA版還追加了可調式車廂LED燈，有別於一般汽車只有開或關的設計，發出的白光也較傳統燈泡柔和，校暗少少當Ambient Light都仲得。此外，2017版的後排還有12V電插座，能夠為手提電子設備、冰箱等用品提供電力。一如以往，左邊A柱底及側鏡殼都設有反射鏡，駕駛者可從鏡中見到汽車左前方的下半部，路壆及行人腳位都一目了然，咁就唔怕刮花軨或轆到人啦！

恒溫系統可獨立控制前排左右冷暖氣，而且備有後排獨立風速調校。

尾門可如雪櫃門般開啟，方便於狹窄停車場取物。

放大圖片

低轉高扭十分慳油

新Stepwgn的動力配置繼續沿用1.5公升VTEC Turbo引擎，擁有最大馬力150ps，而高扭力於極低轉已湧現，結合無段變速波箱，毋須大油催谷已有不錯加速力，大部分時間都可在低轉區行駛，用油都少啲啦！據廠方數據指，每公升油可行到15.7km（JC08），未計燃油折扣優惠都係1蚊1公里左右，都真係幾慳吓。再者，全新Stepwgn SPADA還有多項貼心設計，如冷氣口杯架、中排車窗遮光簾及櫈底鞋袋等等，均可在車上找到，每個細節都從用家角度出發，其餘標準設備還包括17吋軨及窗簾式安全氣袋，另外，提供4種全新車色揀。