Face ID詳測阿Bob：「認樣好叻！」

變雷神都認到

Face ID的原理是透過TrueDepth Camera前置鏡頭，投射超過30,000個隱形紅外線測繪點，作面部數學模型之用。阿Bob除咗眼鏡登記，戴番眼鏡後每次都能成功解鎖，就算之後扮鬼臉皺晒眉都認到。至於LuLu分別戴上雷神面具及束起頭髮，發現一樣解到鎖，證明髮型對Face ID的影響不大。當然也有例外情況，例如單眼或昏暗環境下解鎖會較慢，戴上眼罩遮住半邊臉甚至會失敗。若想提高辨識速度，可把「使用Face ID需要注視螢幕」關掉，這樣解鎖時不用雙眼望住手機，斜視或三七臉都能快速解鎖，但保安程度會相應降低。

LuLu話iPhone X細細部，女仔用啱啱好，如果有番玫瑰金色就更好。	LuLu變咗雷神，遮住啲頭髮都成功解到鎖喎。	Face ID能用於解鎖或Apple Pay，若把「使用Face ID需要注視螢幕」關掉，便能提升識別速度。

Animoji 10秒太短

其實Animoji新功能同樣利用認樣技術，令表情符號跟隨人像做表情和說話，阿Bob指喺家中跟小朋友玩一定好開心，並大讚可將影像儲存成MOV檔案，方便經WhatsApp或WeChat等分享。LuLu則指暫時只有12個表情圖案，而且錄得10秒時間太短，期待稍後可以改善。iPhone X的前置鏡頭有700萬像素，並支援人像燈光模式，愛自拍的LuLu立即試玩，她認為：「用輪廓光影相好正，會有光線打出陰影效果，成個人Sharp晒。」而後置雙鏡頭均加入光學防震功能，最大光圈達F1.8，所以夜晚影相依然清晰自然。

暫時得12款Animoji圖案，可儲存成MOV短片。	使用擷圖功能時，被「M字額」遮掩的位置會自動填平。	iPhone X支援無線充電，就算戴上機套一樣認到。

睇片有「M字額」

新機配備5.8吋全屏幕，不少人都好奇機頂「M字額」會否遮住畫面。小記試播YouTube時，發覺影片可放大用盡全屏，不過「M字額」無可避免凹咗入去。試玩《Pokémon GO》等遊戲時，發現屏幕上下會多咗兩條黑邊，整個畫面稍稍縮細了。相比起來，擷圖就沒有太大影響，皆因被遮掩的位置也可完全擷取下來。此外，新機支援無線充電，實測戴上厚身皮套放上充電板一樣充到電，但留意皮套不要放入八通達等物件，否則會辨識不良。

試相區 使用「輪廓光」影相，明顯將主體輪廓突出，令髮絲更清晰，成像富層次。

用iPhone X睇YouTube雖可放大畫面，但無可避免有個「M字額」遮住。

實試Face ID

除眼鏡解鎖快夾爽。	抬起頭又歪晒嘴都認到。	戴眼罩遮咗半個樣就解唔到鎖。

撰文：陳志滔

攝影：張錦昌