BMW 218i Gran Tourer滿載爽朗

本月初，新登記柴油私家車的排放標準已進一步收緊至LEV III，可惜全港暫時冇一部車達標，柴油熱潮可謂告一段落。不過，趕唔切上柴油「尾班車」嘅車迷又唔使太過失望，雖享受唔到低油價，但唔少車廠都即時引進入門汽油版應市，就如BMW的218i Gran Tourer，車價更實惠、牌費又平啲，條數咪喺番度！

BMW 218i Gran Tourer
售價：$339,900

低容積慳油慳牌費

歐洲MPV近年大舉進襲，部分型號的車價更拍得住日本車，三十零萬元就買到揸寶馬的虛榮感，唔吸引就呃你嘅！繼先前抵港的220i及218d Gran Tourer後，全新的218i是當中入門版，引擎同樣配上BMW TwinPower Turbo，但換成1.5公升三缸，並改配六前速Steptronic波箱。Downgrade咗？係吖，話明入門版嘛！相信好多朋友都懷疑，三缸偈推七座位MPV真係得？老實講，136匹馬力雖唔算突出，但揸落卻是另一回事，由於引擎低扭夠強，實際起步反應其實爽過好多2.0公升NA MPV，仲要5.2公升油就行到100公里，夠力之餘，養車成本也是有限數。

運動化軚盤用上真皮包裹，而且可控制音響及限速功能。

中控台上方設有彩色屏幕，並連接泊車鏡頭。

波箱設有六前速，波棍旁為iDrive選擇器。

車廂好使調配靈活

仲覺得未能入手218d很可惜？不如一齊計吓，據廠方數字，218d的油耗為4.3L/100km、218i為5.2L/100km，再以目前柴油價格$12.15/L及汽油$15.49/L來計算，假如一年行15,000公里，撳一撳計算機，218d每年的油費為$7,837，218i則需要$12,082，油費相差達$4,245。不過，218i的每年牌費僅$3,929、218d則要$7,254，唔計保險及維修保養成本的差別，0~100km/h只是慢0.2秒的218i，每年僅多用$920，但車價平$2萬。點睇？唔好諗咁多喇，買得車都係為咗方便，唔使下下計到咁盡嘅。平心而論，2系Gran Tourer的車廂的確幾好使，除咗中、後排座椅都可翻平外，就連中排前後位置及椅背角度都可調校，空間分配全由自己話事，鍾意點分配都得，更大的行李都放得落。

中排座椅可前後滑動，空間分配更富彈性。

後排設有雙座位，空間都算不錯。

引擎以三缸設計，而且有出色油耗表現。

外形時尚配備好用

2系Gran Tourer的外觀非以傳統MPV的箱形設計，看上去時尚、動感得多，即使是後生仔揸都一樣Match，冇話揸咗阿爸部車出來嘅感覺。假如平時甚少用得着7個位，可索性將尾排的2個座椅翻到地台底，同時將整個中排座椅向後推，擴展了的空間足以讓中排乘客好似大爺咁蹺腳坐。218i話雖入門，設備卻沒有預期咁齋，雙區恒溫、iDrive連6.5吋屏幕、後泊鏡、玻璃天幕等全屬標準配置，仲要Runflat胎，$339,900的車價其實好有競爭力。在218i上，Driving Experience Control已預載SPORT、COMFORT及ECO PRO等3個模式，出奇的是Performance Control都跟車有埋，寶馬對駕駛樂趣的堅持，在入門MPV上也絕不妥協。