Camp Cap露營帽
喜歡美式街頭風格的潮人，大概不會對Camp Cap陌生，因為基本上10個美國街牌10個都有推出呢種設計，雖然此帽有時會被稱為5 Panel Cap，但如果你講Camp Cap大家都會知道講緊嘅係扁扁哋由「4直1橫」5片布料（5 Panel）縫製、頭頂冇凸出「帽的」嗰款。不論剪裁擺位橫直斜或有冇凸出「帽的」都好，只要係用5片布料縫製嘅帽款，都可以稱為5-Panel Cap。舉個例如果該款Dad Hat或Snapback係用咗5片布料縫製（正常係用6片布料縫製），理論上都可以叫做5 Panel Cap，所以Camp Cap基本上一定會係5 Panel Cap，但5 Panel Cap就不一定等於Camp Cap，呢一點絕對要搞清楚！
雖然冇咩文獻道出Camp Cap的前世今生，亦有人會將Camp Cap翻譯為露營帽/5片帽（其實兩者都好核突，而且後者亦唔算十分正確），但普遍都相信Camp Cap設計是源自Cycling Cap而與露營無關（應該係形容帽的形狀好似一個露營帳幕）。兩者最相似地方係剪裁相當貼頭，但Cycling Cap前端帽舌部分較短，而且可以向上翻，剪裁方面通常用3片布料或者4片布料縫製，比Camp Cap少咗正面打橫的哪一片布料。
如果要指名道姓講邊個街牌帶起Camp Cap呢個帽款，相信講係Supreme都冇咩人反對。因為Supreme早在90年代成立初期已推出Camp Cap，更用上各式花布配上招牌Box Logo設計而深得潮人追捧，且每季都有好多不同配色推出，仲不時與英國布廠Liberty及Harris Tweed合作推出以花布或粗呢製成的聯乘款式，就算跟COMME des GARÇONS SHIRT或STONE ISLAND聯乘合作都有推出Camp Cap。至於其他街牌如Stussy、Undefeated或NOAH也常有類同帽款設計，板仔亦人人一頂戴住踩板，由此可見Camp Cap於美國街牌文化中好具代表性。
查詢：（A）3110 5899、（B）2608 4166、（C）www.noahny.com