Honda Vezel 1.5EX 三料升呢

結合了SUV及Coupe造型的Honda（本田）小型SUV Vezel，不但外形年輕、富動感，更以僅21.1km/L（JC08 H+C Mode）低油耗見稱，備受不少車迷追捧。繼去年在港推出升級版後，代理最近又為Vezel推出多項選裝設備供選配，讓車主替Vezel再「升呢」。

售價：$256,880起

Options加持更型格

對車迷來說，搭載1.5公升i-VTEC引擎，最大馬力、扭力分別達到131ps及155Nm的Vezel，無論外觀與實力都非常吸引，如今有得選擇將部車升呢，當然歡迎之至。貼心的代理今次就一次過提供3項新增的Options給車迷選擇，包括（附自動感應功能的）電動尾門、銀色的前後泵把裝飾及車廂氣氛燈，價錢由$3,500至$12,250不等。這3項Options均適合安裝於Vezel LX（基本版）及EX（豪華版）。今次安排拍攝的試駕車更是已裝齊三項Options的Vezel EX，有版你睇，參考吓有幾型仔啦。

頭及尾泵把齊換上銀色加裝飾件，令Vezel的車頭和車尾造型平添幾分粗獷。

引擎的耗油量極低，每公升油可行駛21.1km。

外形粗獷內籠夠Cool

先睇前及後泵把裝飾，齊齊換上銀色加裝飾件，配以左右兩旁的灰黑飾件，鮮明的對比帶來更分明的層次感，亦令Vezel的車頭和車尾造型添上幾分粗獷美。輪到內裝，車廂多處包括波棍台、前後排門板置物位及一對前座椅底等，加裝了紫藍色氣氛燈後，帶來冷酷的感覺，營造不一樣的舒適氛圍。尤其在黑夜，Cool效果更突出。

加裝了紫藍色氣氛燈後，帶來冷酷的感覺，營造不一樣的舒適氛圍。

儀錶板設計簡單易讀，各項行車資訊應有盡有。

電動揭背方便實用

上述兩項Options主要是純粹觀感上提升，接下來的電動尾門，就絕對是以實用和便利性提升為主，最適合講求實事求是的實用派車主加裝。此電動尾門附設自動感應功能，令你毋須大大力拉上拉落，而且不僅可透過按鍵自動開關，還可以用腳輕踢車尾底部正中位置，尾門便會自行打開或關上。尤其是在你雙手忙於取物，無法開或關尾門的時候，包保你每次都會因為加裝了此裝置畀Like自己。