英國直擊網店新搞作
相信對打工仔嚟講，冇嘢開心得過月頭出糧，可以安坐家中網購消費！尤其當英國脫歐，英鎊大跌，網購更加抵上加抵。本地時裝人3大至愛英國網店ASOS、MatchesFashion及OKI-NI，最近齊齊有新搞作。MatchesFashion每季引入數之不盡的高級名牌貨，今夏未到減價潮，已快人一步推出低至5折的新貨優惠，匯率低加減價，變相大平賣，睇啱當然要即搶！而波鞋友經常越洋幫襯的潮網OKI-NI，最近進行緊翻新工程，並將於7月以全新面貌見大家，不妨拭目以待。
參觀倫敦大本營
至於全英國最大時裝網店ASOS，除了經常引入當季至Hit品牌，更有自家設計團隊創作同名品牌，所以每個星期都Keep住有新貨，又不時做減價。最正係買滿12.95英鎊全球免費送貨，所以身邊的姊妹們是長期忠實客戶。
早前，小編有幸拜訪其倫敦大本營，參觀秘密拍攝、Buying Team工作室及率先預覽2017年秋冬自家品牌新作。大家最關心可能是批新貨有咩賣點，依家就率先話你知：來季會玩轉80年代Glamour Style、Flower Power、Colour、牛仔及運動等元素。聽落係咪幾有驚喜？不過最快8月先有得賣，Mark低日子等出血啦！
特派記者：黃秀敏