Moto G5 Plus體感操控揈機自拍

智能手機近年嘅發展似乎已進入樽頸，鬥完硬件玩外形，玩完外形鬥大芒，各大廠商係時候諗吓新方向。剛有行貨抵港的Moto G5 Plus大玩體感操控，好似揈機啟動鏡頭、搖機開閃光燈、反機轉靜音等，操作更添人性化，應該方便到各位用家。

5.2吋全高清芒

自2013年初代Moto G手機面世，不經不覺已推出至第5代。Moto G5 Plus繼續走中階路線，不過就由以往的塑膠機身改為鋁合金機身，加上機面Corning Gorilla Glass 3強化玻璃，耐用度有所提升；值得留意機身同時加入納米防水塗層，可抵受微雨和濺水，遇着雨季都唔怕整濕部機。配色方面提供灰、金兩色唔算驚喜，而且5.2吋屏幕的解像度仍然是全高清質素，但勝在可視角度和亮度不俗，表現合格。

5.2吋全高清屏幕配以強化玻璃及鋁合金機身，耐用度有所提升。

卡槽採用一體式設計，一面可擺放兩張nanoSIM卡，另一面可擺放microSD卡。

卡槽採用一體式設計，一面可擺放兩張nanoSIM卡，另一面可擺放microSD卡。

智慧手勢玩法多

機面跟上代一樣設有指紋辨識器，支援最多5組指紋外，更可變作功能鍵（One Button Nav），例如向左掃代表返回、向右掃開啟Recent Apps、點按彈至主頁、長按關閉屏幕，操作更加直接。另一賣點是內置一系列智慧手勢（Moto Actions），包括打側搖晃機身兩次可開關閃光燈、扭動手腕揈機兩次開啟鏡頭、拿起手機時將來電中的鈴聲轉為震機、當屏幕向下翻轉變為勿擾模式等，用法就手兼實用。小記最鍾意用的是待機通知顯示，屏幕關閉時只要手機感應到震動或搖晃，例如從褲袋拎機出來，畫面就會間歇彈出時間、電量、日期、通知等，唔使次次撳機着芒咁麻煩。

着芒或熄芒下扭動手腕揈機兩次即可開啟後置鏡頭，再揈兩下即轉為前置鏡頭。

支援屏幕分割功能，大部分常用Apps如地圖、日曆、計算機等都兼容。

一系列Moto Actions可獨立開關，內有詳細說明及示範，用家唔使估估吓。

影相功能齊備

硬件方面則搭載Snapdragon 625八核心處理器，並內置4GB RAM及32GB ROM，配合Android 7.0系統操作十分流暢。另一抵讚位是提供一體式卡槽，可同時擺放最大128GB microSD卡及兩張nanoSIM卡，滿足經常外遊的人士需要。此外，新機設有1,200萬像素主鏡頭及500萬像素前置鏡頭，前者提供專業、慢動作影片、全景等模式，後者加入1至7級美顏效果，輕易遮到臉上瑕疵，男女合用。順帶一提，其內置的3,000mAh電池支援TurboPower快速充電技術，廠方表示充電15分鐘便可用到6小時，電量不足時就大派用場。