千元有找 Amazfit智能手錶運動添樂趣

近日天氣回暖，短衫短褲終於可以出動，但成身膩肉點樣見人？一於做運動操Fit啦！最近小米生態鏈企業華米科技研發的智能手錶Amazfit終於在港開賣，不僅內置跑步、單車等運動模式，並支援GPS定位及實時心跳監測功能，更內置記憶體可飛甩手機直駁藍牙耳機聽歌，最吸引係定價千元有找，諗得過喎！

售價：$999（a）

陶瓷錶圈防刮玻璃

近年唔少人跑步都會戴上智能手錶，以記錄和監測運動數據，Amazfit嘅設計同傳統運動手錶差唔多，用上47mm直徑大錶面及炭灰色圓形錶殼，外表睇落平平無奇，實情係錶圈採用陶瓷製作，配以錶面Corning Gorilla玻璃，防刮能力極強，而且整隻手錶僅重53.7g，啱晒跑步佩戴。值得留意，官網雖然提供兩款配色選擇，但其實都係同色錶殼分別配以黑色或紅色運動軟膠錶帶，小記試戴後覺得都幾舒服，流汗時錶身亦不會黏住手腕，加上錶帶採用快拆式設計，毋須工具即可更換。惟官方暫時未有提供另購錶帶服務，貪靚的用家可能要自行配其他22mm錶帶了。

Amazfit備有黑色及紅色錶帶選擇，迎合男女用家要求。

Amazfit智能手錶可無線連接耳機聽歌，跑步時便可飛甩手機。

7大項目記錄數據

操控方面，錶身右側設有一個按鍵，用作開啟及鎖定觸控屏幕，其他功能一律要靠1.34吋屏幕操作。時鐘介面由上向下掃即可作快速設定，下至上掃則可顯示手機通知訊息，而左右掃動可轉換模式包括運動、計步器、心跳、音樂鬧鐘、天氣預報、指南針、計時器、睡眠、訓練中心，惟行貨僅提供英文介面。運動手錶最重要係記錄運動數據，此錶內置跑步、步行、跑步機、單車、單車機、越野跑及滑步機共7種項目，以最常用嘅跑步為例，開啟後會透過GPS偵測位置，並實時記錄及顯示運動時間、距離、配速、心跳等，還會同時記錄卡路里消耗、速度、節奏、路線等，非常詳細。

雖然用上47mm大錶面，但錶身僅重53.7g，戴上手唔覺累贅。

《Amazfit Watch》App簡潔易用，可設定手錶功能及更換錶面。

智能連接無線聽歌

運動數據除咗可以喺手錶即時查閱外，當用家以手機開啟《Amazfit Watch》App更可將數據同步至雲端，之後便可經《Strava》及《小米運動》等運動程式分析數據，預計之後更新韌體將有更多Apps兼容。新錶另一特點是聽歌功能，用家只要將手錶放上充電底座，再透過USB連接電腦即可將音樂檔案拉到手錶內嘅4GB記憶體，跑步時只要將手錶與藍牙耳機無線連接便可聽歌，唔帶手機都冇問題。其他智能功能包括可連接指定Android及iOS裝置，使手錶同步顯示來電及通知，如閣下用緊MIUI 7以上嘅小米手機，更可用到手錶屏幕解鎖功能，夠晒方便。

電池續航力達5天，只要將手錶放上底座即可充電。	錶帶支援快拆設計，更換錶帶毋須工具。	放大圖片
連接藍牙耳機後可播放音樂，中英文歌曲資料都顯示得到。	可以隨時檢查心跳，仲幫你分析心跳狀況。	運動期間，屏幕會顯示運動時間、距離、配速、心跳等數據。
內置跑步、步行、跑步機、單車、單車機、越野跑及滑步機共7種項目。	快速設定介面會顯示天氣、溫度、電量等，亦可調校亮度、靜音等。	除了可選用內置的18款錶面，用家亦可將喜愛的相片化作錶面。