BMW M140i技術型至愛

BMW 1系再有新成員抵港，而且是車系最強的M140i！性能較改款前的M135i更強，而且是市場上所有高性能揭背車中唯一搭配六汽缸引擎的後驅車，想買部夠快、夠Unique的Hatchback？呢部就係啦！

同類型後驅最好玩

巿場上跟M140i類近的Hatchback都有幾多，如Mercedes-Benz A 45、Audi RS 3、Ford Focus RS、Volkswagen Golf R、Honda Civic Type R……等，部部性能都有番咁上下，除非對個別品牌有偏好，否則都幾難揀吓。不過咁，喺以上咁多部車中，只得M140i採用後輪驅動設定，如果FR是必要條件，那就不用考慮了，諗多兩諗，一個唔覺意發現自己有「選擇困難症」，原本用來買車的銀両都進貢埋畀大夫，幾咁無謂。市場上無論是FF、FR或AWD/4WD的車款，都各有特性及支持者，但個人嚟講，FR車始終係最愛，尤其是大馬力的Performance Hatchback，FF似乎有點推、四驅又太咬，動態較「生猛」的FR先係最好玩。

車廂布局與標準版相若，但軚盤就換上M款式。

車頂設有電動天窗，並附有太陽擋。

前排配置了真皮運動座椅，提供良好承托力。

0~100km/h只需4.6秒

用作入替M135i的全新M140i，外觀及內飾都沒多大改動，性能卻有顯著提升，引擎沿用備受好評的3.0公升直六BMW TwinPower Turbo，最大馬力、扭力分別增加至340hp及500Nm，較M135i分別提升了6.3%及11%，0~100km/h更由原來的4.9秒縮短至4.6秒，睇番M2 Coupe的規格，M140i只係用多0.3秒咋！車價呢？M140i平廿幾萬，係咪好吸引先？另一方面，原廠已將M Sport Suspension列為標準配置，雖然調校較標準版硬得多，但又不算十分激進那種，喺鋪裝良好的路面行駛，乘坐舒適性還真不錯，用來做「腳車」都冇問題。開到多彎的山路，等同把M140i帶到表演場地，轉向靈活度拍得住高性能Coupe，只不過穩定度有啲過火位，想個尾生猛啲、部車更有FR的特性，最好將行車模式切換至Sport Plus，有「術」的駕駛者甚至可關掉動態穩定控制（DSC）系統，輕易便可令到車尾滑移。不過在一般道路行駛並唔建議DSC OFF，有技術同埋喺安全場地先好試。

錶板採用雙圓形設計，行車資訊清晰易讀。

後泊鏡屬標準配備，倒後泊車自然輕鬆得多。

引擎可輸出500Nm的強大扭力，加速力非常澎湃。

醒目波箱出彎好力

M140i搭載的八前速自動波箱唔止反應快，波檔選擇亦相當醒目，在Sport Plus模式下，直路上大腳啲踩Brake，波箱好像已知道要準備入彎咁，很快便作出拖波決定，有時拖1個波，有時拖2個或更多，視乎車速而定，大大減少因減速而出現轉數過低導致出彎不上力的情況。想操控自主啲、唔想成日用「D」波咁悶，還可透過軚盤後方的轉波撥片自行換檔，左手按一下就拖一個波，右手按一下就升檔，按幾多下就升或降幾多個檔位，方便得來又快捷。相比起標準版1系，M140i不但多咗M包圍、M Sport Brake及M Sport懸掛，其餘配備都幾齊，例如M多功能真皮軚盤及Dakota皮椅都是標準配置，代理開出$585,000的車價又唔係貴喎。