2,100萬像素前後鏡M6索爆Selfie

愛美係女人天性，揀手機亦然，外形固然要靚，自拍掟上facebook又點可以甩轆？美圖M6就能滿足女士們嘅要求，皆因它主打美顏拍攝功能，前後置鏡頭均有2,100萬像素，仲可實時加入智能美型、去斑去暗瘡、淡化黑眼圈等效果，女神靚相即影即擺上網，可以話係新一代自拍利器！

售價：$3,199

5吋全高清屏幕

以執相App《美圖秀秀》起家嘅美圖公司，推出過一系列手機，最新作M6近日抵港，沿用系列作嘅雙V形機身設計，機背加入曲面玻璃，加上粉紅色嘅金屬邊框，配以月光白、櫻花粉兩款顏色，唔單止外形女性化，手感仲相當好。機身用上5吋屏幕，雖然1,920×1,080解像度唔算特別高，但AMOLED面板色彩豐富，亮度亦充足。順帶一提，此機喺內地另有Hello Kitty特別版，機背印上Hello Kitty圖案及換上專屬主題，不過香港暫時未知會否引入。

多人合照變靚啲

新機嘅賣點係影相，搭載F2.2大光圈2,100萬像素前後置鏡頭，本身嘅拍攝質素經已唔錯，更特意引進Milbeaut影像處理器優化人像效果，內置專為亞洲人而設嘅人臉識別系統M-Face、保持人臉膚色自然嘅M-Color及M-Beauty美顏技術，令美顏效果更逼真自然。小記實際試拍時發現，系統只要辨識到人臉就會於畫面彈出正方框，之後可實時呈現美顏效果。用家能揀選智能美型、去斑去暗瘡、淡化黑眼圈、五官立體化、智能美白5項美顏設定，並提供1至7級效果供調校，設定勁齊全。而且人臉識別功能幾準，就算多人自拍都依然認到樣，一大班女仔合照都可以齊齊變靚啲！

M6用上雙V形設計，機面Home鍵兼具指紋識別功能。

提供月光白及櫻花粉兩色，女士必Like。

前置鏡頭有2,100萬像素，人臉識別時會彈出正方框。

指紋啟動私密相簿

小記即場搵Model試拍，發現1級美顏效果已經好夠用，膚色效果自然，帶點紅粉緋緋嘅感覺，只係開盡7級時效果就有點假。值得一讚係佢唔會令人臉邊緣或背景變得矇矓，幾乎冇穿崩位，而且鏡頭解像度夠高，直接於手機放大相片，連眼線等細微位都睇得一清二楚。此外，新機前置及後置鏡頭均備有LED燈，後置鏡頭更分為左右兩顆，環境暗啲影Selfie都冇問題。其他功能方面，喺相簿介面下輕輕一按指紋識別器即可進入「私密相片集」，唔想畀人睇或者私密相片便可妥善保存。硬件則用上MediaTek Helio P10 2GHz八核心處理器、3GB RAM及64GB ROM，運行以Android 6.0系統變化而成嘅自家MEIOS3平台流暢自如，不過扣分位係不設記憶卡槽，難以擴充容量。

提供5項美顏設定，前後置鏡頭都支援。	主題介面可換上粉紅色，Icons設計統一。	預載《美圖秀秀》、《美拍》等自家工具。
「私密相片集」於相簿介面以指紋才可開啟，相當隱蔽。	機側設有自拍鍵，長按即可開啟相機前鏡頭，再按一下會啟動自拍計時。	金屬機身改用USB Type-C連接介面。
後置2,100萬像素鏡頭，設有左右雙LED燈。	開啟1級美顏後，膚色變得白滑之餘，臉頰帶點粉紅，效果不俗。	7級美顏下人臉明顯太白，與身體膚色有啲唔夾，幸好邊位和背景依然實淨。