360度攝花燈幻化VR小星球

下星期就到中秋節，唔少地方已準備好中秋布置和應節活動，最啱一家大細食飽飯睇吓花燈影吓相。不過年年都用相機或手機影相冇乜新意，家陣興起VR虛擬實景，不如試吓用Insta360 Nano，將iPhone變為360度拍攝神器，仲可以令相片變成球形的小星球（Tiny Planet）效果，好似月光咁圓添！

將Insta360 Nano插入iPhone，即可將手機變成360度自拍神器。

iPhone即插即用

Insta360 Nano用上長條形設計，機身只有約75g咁輕，適合中秋帶去遊山玩水四圍影。它針對iPhone而設計，透過Lightning插口駁上手機底部即可使用，以便用家單手自拍，唯獨是要拆除手機套先裝到上去比較麻煩。幸好一經連接，手機便會自動開啟《Insta360 Nano》App，操作相當簡便。就算各位冇用開iPhone，Insta360 Nano都能夠獨立使用，但只能夠靠長按開關、按一下影相、按兩下拍片等調校設定，自拍或影花燈時冇得即場預覽和取景。

210度魚眼雙鏡

作為全景拍攝神器，其前後各配備210度魚眼鏡頭，能夠影到每秒30格嘅3K（3,040×1,520解像度）影片，又或者462萬像素靜態相片，拍攝時iPhone屏幕會見到晒前後畫面，當中大畫面為前鏡頭，細畫面則為後鏡頭，並自動合成360度球形全景影像，可以即時篤芒碌住嚟睇。小記試拍後發覺360度影像的接合位相當自然，前後影像幾乎沒有光差問題。如果想即時睇番VR影像效果，更可利用包裝盒變身成VR眼罩，只要將iPhone插入眼罩內就睇得到，設計貼心。

Insta360 Nano
售價：$1,699（a）

360度球形全景拍攝幾乎零死角，唔想自己入鏡可以將鏡頭放喺頭頂。

機身前後各備有210度魚眼鏡頭，拍攝時會以主副畫面顯示前後鏡影像。

社交平台即時Share

《Insta360 Nano》App唔單止操作簡易，入面仲有好多特效同玩法，例如拍攝後用家可因應需要加入各式濾鏡，打造獨一無二嘅作品，又或者使用美顏效果美化人像，最啱同花燈Selfie時使用。不過最吸引小記嘅係小星球模式，將全景畫面以球體展現，喺中秋月圓時玩相當應節，影像仲可分享到facebook、WhatsApp、Line等不同社交平台，讓各位即時Share上網博Like。

Insta360 Nano可獨立使用，就算冇用iPhone一樣影到相。	包裝盒可變身成類似Cardboard的VR眼罩，只要插入iPhone即可睇到VR影像。	機身用上Lightning插口，主要針對iPhone 6/6s系列使用。
App能以小星球模式瀏覽，可將拍攝畫面以球體展示。	內建濾鏡特效和美顏效果，令中秋作品與別不同。	影完相後可即時分享到facebook、WhatsApp、Line等社交平台。