IFA鬥搶鏡！智能新錶Vs量麗曲芒

Gear S3兩款選擇

於展前預覽會發布嘅智能手錶Gear S3，用上1.33吋Always On Display屏幕，錶面比上代更大，而且分為Classic及Frontier兩個版本，同樣支援IP68防水防塵標準，前者用上銀色錶殼，配以簡約典雅錶框，適合走斯文路線嘅用家；後者換上深灰色錶殼，齒輪狀錶框線條更明顯，加上刻度設計及坑紋按鍵，感覺粗獷之餘，更符合810G美國軍用標準，迎合戶外玩家需求。

上代用家大讚嘅可轉動錶框，今次Gear S3繼續保留，用家只需左右轉動錶框即可啟動功能表、Recent Apps、Widgets等，唔使每次都篤芒。另內置高度計、氣壓計等功能，同時可記錄用家運動數據，連接手機後可透過咪高峰及喇叭作免提通話。電量則有380mAh，充滿電後夠使用4天，續航力都算強。

Gear S3 Classic（左）及Frontier（右），一款斯文、一款粗獷。	Gear S3 Frontier特意加闊按鍵，並刻上坑紋。	沿用上代可轉動錶框設計，左右轉動可開啟功能表、Recent Apps等。
錶底設有心跳監測器，實時檢測用家身體狀況。	圓形圖示介面清晰，容易上手。	展出多款不同款式及用料錶帶，包括蛇皮、矽膠等。

CF791曲芒首玩量子點技術

Samsung今年初力谷量子點Quantum Dot電視，估唔到下半年便將此技術引進電腦屏幕。34吋3,440×1,440解像度嘅CF791單睇外形已相當注目，皆因屏幕用上少見嘅前後曲面設計，配以近乎無邊框嘅21:9比例，非常有型。而且弧度達1500R，稱得上是全球最曲的屏幕產品，以後打機、睇片都可感受到曲面帶來嘅包圍感及廣闊視野。而且量子點技術嘅色彩豐富，加上屏幕擁有125% sRGB色域、1ms反應時間，並支援AMD FreeSync技術，電競迷應該收貨！

34吋CF791用上近乎無邊框設計，有型！售價：待定	CF791機背玩曲面，底部及背面設有多個連接插口。	展館大門擺放一幅「電視牆」，搶眼度爆燈。

CFG70系列電競拍檔

若嫌CF791尺寸太大，同場另有CFG70系列，同樣採用量子點技術及擁有125% sRGB色域，而且更新率達144Hz。不過解像度為傳統1,920×1,080級數，而弧度為1800R，暫時提供24吋及27吋兩個16:9型號。現場仲擺放多部CFG70畀在場人士試玩《FIFA 16》，無論畫面流暢度、色彩感都有極佳效果，難怪吸引到勁多人挑機。

CFG70論外形冇CF791咁靚仔，備有24吋及27吋選擇。	即場對打《FIFA 16》，仲有大電視同步播放。	今年Samsung獨霸一Hall，分為流動產品、家庭電器、電視3大類別。
發布會場面墟冚，雲集各地傳媒近500人到場。

Quantum Dot電視多選擇

Quantum Dot屏幕能顯示多達10億種顏色，比一般高清電視高出64倍，加上1,000nit亮度令層次和色彩更分明。Samsung於現場宣布在歐洲等地推出多款KS系列Quantum Dot電視，當中最大的88吋KS系列曲面電視早前於香港開售，總算搶飲了頭啖湯。

現場花絮

因乜事喺度射籃？原來係宣傳旗下「大眼雞」洗衣機，可以邊洗邊加衫嘅AddWash功能。	當然唔少得Show Girls撐場，力谷Quantum Dot電視！	現場勁多人爭住玩嘅雪櫃，機身設有21.5吋篤芒並內置Family Hub功能，可以喺芒上睇食譜和短片等。

特派記者：林子聰

鳴謝：Samsung