甘麥基搭俏皮貓整蠱孖寶

Action Toys嘅EX合金系列繼早前推出《忍者小靈精》嘅主角小靈精後，當然要有個專門做壞事嘅對手甘麥基陪襯啦！故事中甘麥基和他的手下俏皮貓可說是整蠱專家，新作除了表情和服飾逼真外，忍具、結手印等配件一應俱全，想湊齊一Set，粉絲記得帶佢哋返屋企！

EX合金《忍者小靈精》甘麥基&俏皮貓
售價：13,800日圓

還原得戚表情

卡通中甘麥基經常整蠱佢嘅同學健一和小靈精一家，當甘麥基奸計得逞時，那個既狡猾又得戚的嘴臉尤其深入民心。今次EX合金忠實還原其招牌模樣，備有嘴藐藐和牙刷Look兩個表情，玩家只需拆走頭髮便可輕鬆替換。至於跟班俏皮貓，雖然屬PVC非可動擺設，但造型似模似樣，如紅色圍巾和額頭十字疤痕等特徵都精細重現，做工相當不俗。

暗器玩法豐富

作為伊賀忍流嘅忍者小靈精宿敵，甲賀忍流嘅甘麥基武藝耍家，玩具附有3枚十字鏢和鐵疾藜，前者可配合右手夾指造型手，重現投擲飛鏢姿勢，後者讓玩家撒在地上玩情景擺甫士。另有專屬鐵指環，可套在指頭上偷襲對手。可動性方面，其膊頭加入拉出式機關，以便將雙臂大幅向前傾，換上結手印造型手便可施展忍術。

除了嘴藐藐模樣，另提供牙刷Look表情替換。	膊頭的拉出式機關，可將雙臂大幅向前傾。	暗器和造型手豐富，輕易擺出不同甫士。
備有卡通台座，可擺出結手印施展忍術甫士。	原著中甘麥基（右）跟主角健一（中）為小學同學。	附有專屬鐵指環，可套在指頭偷襲對手。
配合右手夾指造型手，可重現投擲十字飛鏢的姿勢。