Hoverboard「踩」入工廈花式平衡

電動平衡車（Hoverboard）喺外國極之流行，但嚟到香港就冇乜聲氣，皆因喺街上踩電動車有機會觸犯法例。為此平衡車製造商Azzita，喺觀塘開設咗一個電動平衡車體驗場，畀一眾想「踩車」嘅人試玩，現場仲有賽道和斜台畀你玩花式，連Model都話玩過之後唔捨得返落嚟！

喺Hoverboard玩花式好考平衡力！

5,000呎場地每月換賽道

Azzita製造商主要將平衡車賣到台灣、歐美等地，而今次首度喺香港開設佔地約5,000呎嘅體驗車場，目的係推廣呢種運動之餘，仲做埋體驗、購買和維修等一條龍服務。場地負責人Kile表示：「車場賽道主要以水馬構成，長約100米左右，並設有不同彎道，方便測試平衡車嘅性能，每隔一個月左右就會變換賽道，等大家Keep住新鮮感。」

4款平衡車選擇單轆難度高

別以為Hoverboard淨係得一款，其實備有不同Size選擇。Kile表示：「10吋輪胎嘅Hoverboard，由於用上充氣胎，所以避震能力和穩定性較佳，亦係眾多平衡車中最大，適合新手玩。而8吋輪胎嘅車身較高，性能係當中最好，可上到30度斜坡。至於7吋輪胎屬經典款式，特性係短距離加速較快及靈敏度高，用嚟玩花式最啱。」其實場內除咗3款Hoverboard之外，還有單轆嘅HoverCloud玩，原意來自陸上衝浪，所需嘅平衡力和技術較高，小記練咗半個鐘先可以行到直線。

做足安全措施

大家唔識玩Hoverboard都唔緊要，皆因場內有工作人員指導新手動作。「一般人大約10分鐘內就能夠學識基本操作，場內仲擺放咗兩種唔同高度嘅斜台，當大家熟習後便可嘗試上斜。練熟咗仲可以試吓玩花式，包括單腳企Hover Turning、坐住玩Hover Sit Riding、單邊企Half Board Riding等。」不過玩乜都好，最重要注意安全，Kile強調：「考慮到安全性，場地最多只可供14人一齊玩，而且一旦入場就必須佩戴頭盔、護膝、護肘和護腕，加上場內柱角有2.5cm防護EVA包邊，萬一唔小心撞埋去都冇咁痛。」

3款Hoverboard可供選購，上至下分別為10吋（售價$1,900）、8吋（售價$2,280）和7吋（售價$1,480）款式，它們均備有FCC、CE、RoHS、UL、MSDS等認證，連電池都有UN38.3認證，玩得安心。	單轆嘅HoverCloud極考平衡力，感覺好像陸上衝浪一樣。售價：$2,730	Azzita場地負責人Kile指，香港冇乜地方可以玩Hoverboard，所以專登開設場地供大家試車。
現場設有兩種斜台，較矮的斜台能夠測試Hoverboard攀力，亦能夠喺上面轉圈玩花式。	5,000呎場地最多容納14人一齊玩，仲可約埋班Friend包場。	免費提供頭盔、護肘、護膝和護腕，入場記得要佩戴。
場地陳列了多款Hoverboard，各有不同花紋，總有一款啱心水。	唔識玩都唔緊要，工作人員會指導新手學習基本動作，一般10分鐘內就能上手。