北京直擊！十核Pro 6 3D Press「壓」陣

國產手機市場近年烽煙四起，除咗鬥低價嘅入門機，仲有規格拍得住機王嘅旗艦型號。以國產大牌Meizu（魅族）為例，上星期剛推出799人民幣嘅入門機m3 note，一星期後緊隨發布旗艦級Pro 6。今次新機大玩十核噱頭，仲喺5.2吋屏幕加入3D Press壓力感應，輕按即開Apps，大力撳會彈出快捷列，而且以2,499人民幣頂爛市，各位是否心郁郁？

售價：2,499人民幣（32GB版）、 2,799人民幣（64GB版）

5.2吋芒日夜啱Feel

Meizu新機王Pro 6與上代Pro 5的發布時間只相距半年左右，但由外至內都全面更新。圓角直板機身、噴沙金屬機背、2.5D弧形玻璃，並提供黑、金、銀3色，拎上手嘅感覺有點似iPhone 6s。不過其Super AMOLED全高清屏幕的尺寸由上代5.7吋縮減至5.2吋，特別在屏幕亮度可由最高450nit調至最低3nit，就算帶出街於強光下依然睇得清楚，臨瞓前熄晒燈篤電話亦唔怕刺眼，配合「護眼模式」可調整畫面色溫，減低藍光對雙眼嘅影響。

Pro 6的屏幕縮減至5.2吋，以便單手操控。

提供銀、金、黑3色，前兩者會用上白色機面，而後者改用黑色機面。

用上USB Type-C 3.1介面，耳機插口改至機底位置。

壓力感應方便操控

屏幕除咗可調校光暗，仲首次加入3D Press壓力感應功能，用法其實與iPhone 6s嘅3D Touch接近，輕按圖示可開啟Apps，用力按壓Icon會彈出快捷列，如相機Icon提供錄影、自拍；電話Icon則設有新增連絡人、搜尋連絡人，小記實試時發覺靈敏度幾高，毋須過分用力都可使用此功能。除了備有19款原生工具，還同時支援20款第三方工具包括《微信》、《微博》、《美圖秀秀》等，廠商表明會開放3D Press嘅開發程式，日後支援嘅Apps肯定愈嚟愈多。

機面實體鍵輕觸時為返回鍵，按下即可跳回主頁，同時支援指紋辨識功能。

採用熱插拔SIM卡槽，兼容中港3G及4G，可惜不設記憶卡槽。

5.2吋屏幕尺寸唔算好大，但亮度、色彩及可視角度一流。

3D Press支援第三方程式，好似《微博》提供好多快捷功能。

效能與電量取得平衡

作為旗艦機，規格當然要有Gimmick，新機屬全球首部搭載MediaTek Helio X25十核處理器嘅手機，加上4GB RAM用來打機兼多工作業都流暢自如；不過小記以《AnTuTu》跑分，只見新CPU僅獲96,717分，效能比現今採用Snapdragon 820處理器的機王有一段距離，但勝在耗電量可取得平衡。此外，新機採用USB Type-C 3.1介面，傳輸速度比USB 2.0快10倍，亦支援mCharge 3.0技術，充電10分鐘可回至26%，60分鐘即可將電量充滿。