Volkswagen Golf R Racing Edition旗艦加辣

掛上「R」之名的Volkswagen Golf，象徵高性能，也是車系的性能旗艦，廠方最近為全新的Golf R加推Racing Edition，馬力依舊300匹，但車身內外都換上更熱血的配備，包括19吋Pretoria輪圈及碳纖側鏡殼等，賣相更為賽車化。

Volkswagen Golf R Racing Edition 售價：$499,980

實用駕駛樂趣並存

當今2.0公升Turbo引擎的威力絕對唔係人咁品，以前有二百零匹已經好厲害，依家好似Golf R咁，馬力已達到300匹，4.9秒就可以完成0~100km/h加速，不用$50萬的車價其實好抵玩。今次測試的Golf R建基於7代Golf，採用五門揭背布局，實用性比雙座位純種跑車高很多，唔只可乘載5名成年人，尾箱空間也有一定水準，對於要求高性能、好玩，又不打算擁有Second Car的消費者來說，Golf R無疑可滿足到實用與駕駛樂趣的雙重訴求。

賽車模式攻彎穩定

開Golf R很容易令人上癮，揸到唔想落車，高性能固之然是主要因素，就連把聲都吸引過人，無論是轉波補油聲或高轉排氣聲浪都令人回味無窮。唔想太高調？少擔心，在行車模式中可自行調校，深夜出入住宅區都唔怕騷擾到其他人。動態底盤控制（DCC）是Golf R的標準配備，離地距亦較標準Golf降低20mm，懸掛在「賽車」模式下尤其進取，配合VW著名的4MOTION四驅，彎路穩定性無出其右。此外，四輪電子差速鎖「EDS」及「XDS+」亦已列為預載項目，其原理是當汽車轉向，系統會透過制動把內圈車輪的轉速減慢，主動形成轉速差，使入彎更順暢，大大減少推頭的現象。

引擎容積只有2.0公升，馬力卻高達300匹。	波箱為六前速DSG，換檔反應非常快速。	增設後泊鏡，後方阻礙物睇得一清二楚。
座椅不但繡上「R」徽章，並加上碳纖紋理。	後排設有三座位，空間算不錯。	頭燈組整合雙「U」形日間行車燈，顯得分外神氣。

舒適模式房車Feel

高性能汽車的舒適性向來都麻麻，不過Golf R就兼顧埋呢瓣，就算在「賽車」模式下，車身彈跳都唔大，長時間使用都接受得到。假如要接載唔多戥得嘅老人家，只要按下波棍旁的行車模式選擇鍵，再直接在中控台上的觸控式屏幕中點選「舒適」就得，乘坐感即時變成房車咁。今次廠方推出的Racing Edition，除了上述提到的19吋Pretoria輪圈及碳纖側鏡殼外，還加入了碳纖樣式的內飾及後泊鏡，車價依然唔過$50萬，都咪話唔引人！