健康低脂香滑蘑菇湯
年初九，相信大家已經飲飽食醉，但望吓天氣，猶如踏入回南天！再望望個肚腩，大件事！大個「仔」了很多啊！放心放心，未來數集的《靈感煮意》，我已預備好多張瘦身食譜和低油小食，幫大家為操Fit做好準備！每逢大節過後，我都會做些低卡而飽肚的菜湯，吃時加片烘麥包、一隻水煮嫩蛋，乾聽都知健康又好味。今次教大家做的香滑蘑菇湯，是傳統做法的低脂改良版，無忌廉、無牛油、只有少量麵粉，大家自然可以飲得飽又不怕肥啦！
做法方面，將乾花菇用熱水浸1小時至軟身，握乾水、去腳切片待用，浸菇水則留起。以中火、白鑊，將兩款蘑菇炒至水分收乾，加入乾百里香，略炒，加入麵粉炒3分鐘，然後灒少許雞湯，將有可能黏在鑊面的香草和麵粉炒至黏住菇面便可熄火待用。轉用湯煲，調校中小火，下1湯匙橄欖油，將乾葱和蒜頭粒炒至透明，然後加入蘑菇和花菇片，倒入雞湯和浸菇水，煮滾後轉小火煮1小時。熄火後，用筆形攪拌器將湯打至幼滑，最後加入牛奶和鹽，開中火煮5分鐘便可享用。想知詳細做法，立即上東網收看我為大家拍攝的視像教學，炮製一煲低卡健康湯去整頓吓個肚腩仔啦！
分量
6碗 每碗115卡路里
材料
乾花菇 60克
浸花菇用熱水 450克
啡、白蘑菇（去腳、切片） 共400克
乾百里香 1湯匙
中筋麵粉 1/2湯匙
橄欖油 1湯匙
乾葱（切粒） 50克
蒜頭（切粒） 1粒
低鈉雞湯/菜湯 600克
全脂牛奶 240~340克（若喜歡喝稀湯，可放340克；濃稠的，則是240克。）
海鹽 1/2至1茶匙
靈山小貼士
1.不吃五葷的朋友，可用同等分量的西芹，取代乾葱和蒜頭。
2.想湯更幼滑，但又沒有數千元的攪拌機，我發現用一般嘅攪拌機也可以，只需將湯比平時打多一點時間，便可達到類似效果。
3. 若對牛奶敏感，我試過用無糖鮮豆漿來煮製，味道都可以，但需放多些鹽來調味。
4.將湯打碎前，可取出部分菇片最後加回幼滑湯中以增加口感。
Profile
周靈山，愛情及食譜專欄作家。後創辦網站lively.com.hk，推廣懂愛、懂吃、懂心靈快樂的人生。
Facebook︰http://www.facebook.com/lively.com.hk/