THETA S 360度Live View自拍

黑色橡膠機身

THETA S用上黑色橡膠機身，唔似上代咁色彩繽紛，雖然睇落冇咁搶眼，但機身新增LED模式指示燈，能顯示當前使用模式、Wi-Fi狀況等，而且底部加入HDMI插口，以便接駁電視或顯示屏實時串流影像。拍攝功能方面，由於機身前後各配備180度魚眼鏡頭，合併後就變為360度全景影像，可拍攝5,376×2,688解像度相片，及最長25分鐘的1,080@30fps全高清影片，比上代只能夠每次拍3分鐘短片，明顯大幅進步。

實時取景拍攝

其實上代THETA已能透過App遙控拍攝，不過影完相要過落手機先知拍成點，取景時盲摸摸頗為不便。今次THETA S終於支援Live View實時拍攝功能，可因應用家喜好，在《THETA S》App揀選全景或全屏顯示模式，後者可即時喺手機縮放和碌住睇球形影像；同時Wi-Fi傳輸速度提升近4倍，過相唔使等咁耐，畀各位第一時間將靚相擺上社交網站。不過Live View功能暫只適用於影相，對應唔到拍片要扣少少分。

THETA S 售價：$3,290	新機支援Live View實時拍攝，望住手機取景唔使盲摸摸。	如果淨係想影風景，可嘗試將THETA S擺喺頭上，咁就唔會影到自己。

60秒長時間曝光

新機的拍攝模式亦有所改進，除了俗稱「傻瓜Mode」的自動模式外，更引入快門先決、感光度先決和手動曝光模式，最驚喜是支援60秒長時間曝光和間隔拍攝功能，咁就可以玩到球形全景的Light Painting，甚至連星空和煙花都影得到。同場還帶來適用於THETA S的配件，包括TS-1保護皮套、五色相機帶扣環座，還有外觀似足試管的TH-1防水滴保護殼，就算在惡劣天氣拍攝都冇問題。

機旁設有開關、Wi-Fi和影相/拍片鍵，操作簡單易上手。	增LED模式指示燈，會亮起Wi-Fi、影相、拍片等圖案作識別。	底部除了腳架孔和USB外，還有HDMI插口供接駁顯示裝置。
全屏顯示模式影出球形相片，能夠喺手機放大縮小和碌住嚟睇。	全景顯示模式以長條形顯示，用手機取景時睇得冇咁清楚。	將相機帶扣環座扭入THETA S底部，便可扣上相機帶。售價：$140/各
TH-1防水滴保護殼，帶出街拍攝時可遮風擋雨。售價：$300	TS-1皮套提供貼身保護，外形Classic。售價：$250

規格表

感光元件：1,200萬像素CMOS×2

光圈：F2.8

感光度：ISO 100~1,600

體積：44×130×22.9mm

重量：125g

撰文：黎子豪

攝影：郭凱敏　

查詢電話：2926 2300