極(火羅)新車主
有人窮一生精力，大器晚成，將夢想實現。有人一世好運，少年得志，輕鬆實踐理想。但……有冇反轉諗過成世都未必遇到的不如意事，有人接二連三咁遇上？最近有同事榮升車主，實在可喜可……咪咪咪……恭喜住！因為鑊鑊甘事件隨即發生，抄牌、被拖走、交警捉、車身損毀，接踵而來。唔少人晚上會偷雞將部車泊街，翌日早上揸走，慳番停車場費，俗語有云，上得山多終遇虎，始終係違例泊車兼阻街。事主某個早上在自己所住屋苑一個掘頭路迴轉位取車，赫然發現部車不見了，他腦裏立即浮現：「難道記錯泊車位置，冇理由！明明泊這裏……」「被偷？車齡近廿年，又未到古董級，邊個會吼？」正當慌失失之際，路邊阿伯說：「係唔係搵車呀？畀人拖走咗喇！」結果要打的去車輛扣留中心贖番部車，咁就唔見咗五舊幾，
唯一慶幸只得一張「牛肉乾」，唔見多三百二，全日使費仲未過千！不到幾日，事主駛經斧山道迴轉處，切了連續白線，不幸地被一名埋伏的交通警野生捕獲，今次痛失四百五兼扣三分。還有，在停車場內迴轉落樓的狹窄斜路，車身擦牆角，車門撞凹兼花埋……點解全部都同迴轉位有關，難道轉到頭昏腦脹，胡亂闖禍？幸而這位同事總算經一事，長一智，立即租停車場，以後睡覺唔使心掛掛。揸車聚精會神，唔敢再犯交通規例，繼續享受駕駛樂。今期《汽車世界》特別號介紹的Volkswagen Golf及Mazda2特別版以慳油易操控見稱，期望同事操熟手車，可以放心出新車，甚至買Mercedes-Benz G-Class玩越野。