Back to School！篤芒學得Free
子女嘅開學支出年年加，最近有調查指出開學的平均開支達$4,000~$6,000。過兩日就踏入9月，喺Back to School嘅大日子，未知莘莘學子準備好未呢？除了買齊課本及文具外，唔好忘記為手機安裝「開學Apps」，皆因唔使花錢就有好多實用工具，包括記事計數、網絡字典、腦力訓練等，幫各位慳荷包。
輔助工具篇：《Dictionary.com》網上字典
字典係學生哥必備嘅工具，喺手機裝一個App便可取代重如磚頭嘅實體字典，當中以《Dictionary.com》英英字典較受歡迎，除了解釋簡單易明，更備有真人發聲，但限制是手機一定要上到網先用到。
另提供例句、文法、俚語等相關資料，不過這些選項要額外付款。
《Duolingo》課餘學外語
想搭車或課餘時學外語？用《Duolingo》就幫到手！雖然手機應用程式同真實課堂相差甚遠，但透過此App可由淺入深學習語文，以有趣的方法學到文法應用、生字詞彙等，仲可以跳級測試自己嘅水平，備有西班牙文、德文、法文等選擇。
實用筆記篇：《Evernote》記事必備
現代學生嘅忙碌程度可能不下於打工仔，要兼顧上堂、功課、補習、課外活動，若沒有《Evernote》這類好用嘅記事App，隨時做漏嘢都唔出奇。《Evernote》好用之處在於能夠將文字、語音、圖片、待辦事項等資料同時儲存，記事時彈性好高，比手寫Organizer更方便。
《CamScanner Free》整理Notes
以往要將Notes數碼化，可能要返到屋企用掃描器逐張Scan，現在可將手機鏡頭充當掃描器使用！《CamScanner Free》是少數能免費使用的手機掃描器應用程式，掃描後的影像可儲存成JPG、PDF檔案，不過程式的OCR認字能力仍有改善空間。
腦筋記憶篇：《Elevate - Brain Training》提升集中力
對不少學生哥來說，要集中精神溫習絕對係一大難題，好可能隔幾分鐘就拎手機出嚟玩。但有時玩手機未必係壞事，好像這個「腦力鍛煉」App《Elevate - Brain Training》，可讓大家提升集中力，學習英語生字、閱讀理解等，玩幾分鐘即時精神晒！
《myHomework Student Planner》準時交功課
幾時測驗？幾時交Project？相信好多學生都遇過「失憶」嘅時候。用《myHomework Student Planner》便可分門別類地將測驗、功課、考試時間儲存好，大家更可設定優先次序及依時依候提醒，唔怕失魂被扣分。
數學計算篇：《MyScript Calculator》手寫計數機
一般計數機App要在畫面上按數字鍵及加減乘除等，《MyScript Calculator》則可直接於手機畫面手寫算式，連Tan、Sin、Cos等都認得到，雖然唔似某些高階計算機App可以Plot Graph，但佢可以畀大家揀小數位及慣用左手或右手設定。
《Free Graphing Calculator》繪圖求答案
要以繪圖尋找算式的根值，可能考起不少學生，但用《Free Graphing Calculator》這個手機應用程式，只要輸入最多4道Equations，程式便會在格仔紙上準確繪畫曲線圖，對大家理解算式好有幫助。
撰文：布偉倫
攝影：謝孝祥