4.5吋方屏銀莓神速觸鍵

都市人講求效率，無論覆電郵、打WhatsApp都愈快愈好，但部部Smartphone都用虛擬鍵盤，篤芒打字點會就手。BlackBerry黑莓喺呢方面就有優勢，新機Passport Silver Edition的QWERTY實體鍵盤仲加入觸控功能，可上下左右Drag進行不同操作，神速玩WhatsApp冇難度！

售價：$5,388（9月2日發售）

銀色時尚設計

新機屬上年推出的Passport嘅後繼型號，機身經過重新設計，改用銀色不銹鋼機框，感覺更時尚穩重。機背設計亦費盡心思，上代玩磨沙處理，今代換成鑽石形花紋，防滑效果明顯提升。另一改良之處是Passport Silver Edition的機身輕微加長，邊角更為圓滑，雙手打字時冇咁頂手。用家最唔習慣嘅可能係其4.5吋1,440×1,440解像度觸控屏幕，由於採用較少見嘅1:1比例方屏，比一般手機的畫面闊得多，睇網頁、地圖等內容會更廣闊，但睇相片和影片上下黑邊就粗咗好多。

QWERTY觸控鍵盤

BlackBerry手機最大賣點係QWERTY實體鍵盤，新機嘅鍵盤以三行排列，按鍵大小、回彈手感都唔錯，今次仲喺鍵盤加入觸控功能，例如向上掃可揀選關聯字、向下掃則會彈出數字及標點符號、由右至左橫掃刪除文字、輕拍兩下變成浮標選擇已輸入文字，覆WhatsApp和電郵更加爽手，其他手機難以匹敵。此外，一般使用情況下觸控功能都有用，好似喺主頁可以左右掃撥頁面，上網時可用來滑動網頁，實用性極高。

觸控鍵盤採用三排布局，機底更設有喇叭。

Passport Silver Edition （右）機身比Passport（左）長約3mm，並加入圓角設計。

Passport Silver Edition （右）機身比Passport（左）長約3mm，並加入圓角設計。

拆開背蓋可安裝nanoSIM卡及microSD卡，支援4G網絡。

新版系統流暢

硬件方面，新機搭載Snapdragon 800 2.2GHz四核心處理器及3GB RAM，多工處理極流暢。軟件則換上全新BlackBerry 10.3.2系統，實用功能如將短訊、WhatsApp、郵件、BBM等整合處理嘅BlackBerry Hub；可下載各類應用程式的《Amazon Appstore》及《BlackBerry World》等都有齊。而BlackBerry Protect功能亦有所提升，用家開啟相關功能後，若然多次輸入錯誤密碼，手機便會上鎖，其他人執到部機都得物無所用。順帶一提，新機內置3,450mAh電池，使用時間長達30小時，若然配合電池省電模式，電量再增加15%，相當長氣。

機身厚9.25mm，比上代仲要薄0.05mm。	機背用上鑽石形花紋，防跣效果非常好。	試相區：1,300萬像素鏡頭支援Time Shift模式，會連拍11幅相片，用家更可獨立揀選臉部特寫作合成。
內置電池省電模式，可增加續航力。	內置BlackBerry Hub，將常用通訊工具整合處理。	多工處理表現不俗，轉換Apps亦見流暢。