1:50遙控像真船 食浪鬥架勢

DIY發揮創意

今次「香港像真遙控模型船技術交流會」嘅玩船地點喺屯門公園水池。將船擺喺岸邊未出航已有一大班人圍觀，皆因艘艘都造得極之像真。其facebook群組管理員Victor表示：「模型船嘅種類五花八門，工作船、遊艇、戰艦都有，我哋主要選擇帶有工作性質嘅船進行模仿，例如補給船、漁船、水警船等，主因是設計較有特色，玩味更高。」他續道：「唔似得遙控車、遙控飛機有大量現成零件，遙控船嘅現成品和零件較少，所以大部分都係玩家DIY，雖然製作難度較高，但可充分發揮玩家嘅技術與創意。」

搜集資料製作

正因為缺乏現成作品，所以要DIY像真模型船，一定要先上網搜集船隻嘅俯視圖、側面圖等，一般會製作長2.5呎至3呎船身，比例大概1:50，Size較大的甚至會去到1:40。Victor表示：「船身愈大基本上有愈多細位，只是體積太大就變得難以收藏。以我手上嘅70年代遠洋拖船1:50 Smit Rotterdam為例，長逾4呎，重達30kg，於家中擺放需要頗多空間。為咗運送船隻到水池，除了要靠特製車仔搬運，上落水都要兩個人或以上協助。」模型船主要分為船殼（船底部分）及船身（甲板部分），當中以船殼對航行的穩定性最為重要。「設計上要考慮浮力、船身入水、耐用度等，發燒友多數會以玻璃纖維製作船殼，因為輕身、防水兼抗腐蝕。另要計算船隻食水線，需要不斷落水測試，再因應重量喺船殼內加入鉛塊或其他重物。最後連接摩打、波箱、電池、遙控裝置等零件後，基本上就可以落水。」

仿照70年代遠洋拖船Smit Rotterdam，以1:50比例製成，船殼以玻璃纖維打造，價值逾$40,000。	遙控器可控制船身前後左右移動，操作容易，Model一玩即刻上手。	Victor表示發燒友多數會揀船頭較鈍款式，皆因航行時船頭浪有氣勢得多！

中速食船頭浪

叫得做像真模型，船身當然要以像真為大前提，一般會以膠板製作船艙，配合銅等金屬打造細節位。發燒友除了會加設機械裝置如電動船錨、風向儀、夜航燈等，仲會加設排水泵，將內部嘅水自動排出船外；有些甚至加裝射水裝置，邊行邊噴水，令航行更加有型。Victor補充：「玩遙控船必須注意船頭浪，皆因浪愈大便愈有動感，氣勢更強！為咗令造型更逼真，發燒友會似足真船咁以中速航行，絕少鬥快。操控時亦有一些技巧，例如水池上咁多艘船航行，難免會受浪花影響或撞翻，要睇清楚航道預早『救船』。」

製作時以玻璃纖維船殼為基礎，再加入其他零件。	船錨設計精細，並加入電動摩打，製作更加複雜。	航行時難免入水，所以摩打、波箱等零件會特別托高，並裹上防水膠紙。
連風速儀都有埋，同樣識得電動轉動。	「香港像真遙控模型船技術交流會」facebook群組管理員Victor。	型號為Happy Hunter，其噴水裝置可邊航行邊射水，價值約$10,000。
仿照財利船廠出品的像真船，5年前造價約$8,000，全港只有3隻成品。	現場有唔少高手帶同作品Show Off，當中有天星小輪、「達汶三型」水警船等，場面墟冚，每艘價值由數千至過萬元不等。

香港6大模型船池

相比遙控車及遙控飛機，遙控船嘅曝光率相對較低，主因是受場地所限。香港指定嘅船池只有6個，分別位於維園、柴灣公園、天水圍公園、大埔海濱公園、屯門公園以及開幕咗冇耐嘅香港單車館公園，不過只限玩電動遙控船，當中以屯門公園嘅水池面積最大。

模型船組織及活動

香港有不少遙控模型船組織，聚集一班同好交流和活動。當中「香港像真遙控模型船技術交流會」以成品逼真為先，其群組管理員Victor表示：「我們每逢星期日都會於屯門公園模型水池聚集，各位有興趣的話可以到場交流，成員好樂意分享製作心得和操控技巧。」此外，嚟緊9月13日有團體將舉辦屯門遙控模型船競技日，比賽時間由9:30am至6:00pm，分戰艦、仿真船兩組，以外觀及航行形態作為評分項目，有興趣的話不妨到場支持一下。

撰文：林子聰

部分攝影：張群生

模特兒：Kate Ng（Zmodel）