有的士司機抗議Call車App取酬載客搶生意，明明去年正義地站出來反對市民以公民抗命形式示威，偏偏今次卻發動慢駛阻街抗命。
可想而知，好一部分市民睬你都有味，有網民發起一股數臭的士佬的熱潮。
的士佬（即「部分的士佬」呀，唔講明又怕萬中無一的優質的士大佬蒙冤受屈。下同）臭名遠播，得罪人多稱呼人少，你唔抗命猶自可，你一抗命，就激起乘客們爭相出來分享受你氣的慘痛經歷。
有人話，的士佬近又嫌近，遠又嫌遠，拒載時有發生，就算有幸得到司機大佬寵幸成功上車，也得有心理準備全程受氣。
就的士佬出來公民抗命那天，我在荃灣截車去葵涌，截停第一架後，司機大佬問完我去邊，就話佢要交更，唔得閒，也未待我回應半句，車已絕塵而去。好不容易多等5分鐘，終於有好心的士停車兼破例不事先詢問目的地而讓我上車，我以為終於給我碰到有好人司機，豈料他聽到我去葵涌之後，竟然話唔識路。我去的也不是荒山野嶺，但既然司機開到口撒賴，我就惟有打開Google Maps話教佢行。佢應都唔應機，一路直行，我問：「你又識路喇？」司機大佬語帶晦氣說：「識就梗識嘅，怕兜你路啫。」
就這樣，我被他嬲到落車那一刻，他也未消氣……
至於付車錢時，當然循例都是四捨五入唔找錢。
喂幾毫子你唔係同司機計呀？係嘅係嘅，所以今天的士佬要公民抗命，就預了好一大批市民都不同情你們咯。
網址：www.facebook.com/linrixi