翻撻四驅熱大細路飆記

「上呀，麥林號！」每次聽到呢句熱血對白，一眾70、80後都會有一種莫名感動。無論你係屬於《四驅小子》抑或《四驅兄弟》年代，當年捱麵包、扭阿媽買車、買摩打嘅大家，話唔定依家已經成家立室！適逢近年迷你四驅（下稱四驅車）熱潮翻撻，除咗讓各位老竇級重拾砌車、鬥車樂趣，仲可以同囝囝、囡囡齊齊玩，將陳封嘅童年回憶傳承至新一代，又幾Sweet喎！

四驅狂迷女兒顯身手

同好多四驅車迷一樣，Terry兒時因為卡通片《四驅小子》而迷上四驅車，仲玩到上電視，他笑言：「當時係四驅小子冠軍隊嘅成員，更獲邀出席電視節目《歡樂今宵》，如果大家記得嘅話，有一位小朋友同曾江在清水灣道比賽四驅車，而呢位小個子就係我喇！」Terry憶述：「細個冇咩零用錢買零件，買到一個摩打已經好犀利、好威，可能連一般工具都冇，有時甚至用指甲鉗扭螺絲，總之用盡任何方法令架車行得郁！」對四驅車嘅熱情，難免隨着年齡減褪，他說：「細個比賽完後，都有一段長時間冇玩。」但四驅熱潮重臨，卻有種重溫舊夢嘅衝動，Terry除咗玩番四驅車，更與友人開設迷你四驅車場。「因為要入貨，所以對零件、底蓋、路軌都一定要有深入了解，砌車同路軌嘅過程，竟然吸引囡囡Chani目光，並參與埋一份添！」僅得4歲嘅Chani對「四個轆」出奇地有興趣，雖然手仔細細又唔多夠力，暫時未識砌車，不過裝嵌輪胎、安裝車殼等簡單動作都難佢唔倒，就連扭轉開關、放車落軌道、收車等較複雜動作都應付到，長大後絕對有潛質成為《四驅小子》漫畫中操控舞娃娃嘅輪子！

放大圖片

囡囡Chani年紀仲細，但砌車嘅簡單步驟都應付得到。

Sam近期最Like嘅熊貓車，設計超Kawaii；留意車身貼紙其實有啲歪，不過小朋友嚟講算合格有餘o架喇！

Sam近期最Like嘅熊貓車，設計超Kawaii；留意車身貼紙其實有啲歪，不過小朋友嚟講算合格有餘o架喇！

放車父子兵延續熱情

至於另一車迷、70後嘅Eric，重玩四驅嘅過程同Terry不謀而合，每次砌車時，6歲嘅囝囝Sam都會坐喺隔籬睇實：「佢好鍾意睇砌車過程，甚至貪得意攞螺絲批上螺絲。」既然咁有興趣，Eric就順勢教囝囝砌車。「開始時教佢睇圖（說明書），然後再了解零件擺位、裝嵌方向」，起初大部分嘅砌車工序由Eric代勞，但依家囝囝幾乎掌握所有步驟，更有3架完成品添！訪問期間，Sam又動手砌第4架了，眼見佢裝嵌摩打、放齒輪等有板有眼，當Sam遇到唔明白地方，Eric會從旁指導，放車時有講有笑，父子感情幾難唔好！Eric表示，砌車對囝囝有正面影響：「砌四驅車令佢加強專注力，而上螺絲、貼貼紙呢啲仔細、需要手指肌肉嘅動作協調，對小朋友係好大挑戰，好容易會半途而廢，一定要鼓勵唔好放棄，堅持到最後。」Sam鍾情四驅車，但唔似得70、80後受卡通影響，揀車唔會揀地平線、火燄陽、旋風麥林或者暴風超音，主要係揀顏色；近期最得寵就係得意到暈，唔少大人都鍾意嘅橙色越野熊貓車。

砌車、Set車需要不同類型嘅工具、零件，絕對唔係玩具咁簡單。

Sam年紀細細已經識得砌車，有3架完成品，今年仲會同爸爸Eric一齊參加「迷你四驅WHAMPOA CUP」親子組！

Sam年紀細細已經識得砌車，有3架完成品，今年仲會同爸爸Eric一齊參加「迷你四驅WHAMPOA CUP」親子組！

參照大帽山英雄亭，屬本地賽車勝地，隔離再擺多架戰車，幾有Feel。

立體賽道漫畫回歸

香港翻撻四驅車熱潮，好大程度是大量舊車復刻、新款推出，唔少車款更加出現炒價，當年幾十蚊嘅車款依家隨時三位數字先買到；另外，以前冇咩點見嘅四驅車場愈開愈多，吸引到新舊四驅迷。講到玩，唔少得大型四驅車比賽，今日開始舉行嘅「迷你四驅WHAMPOA CUP」，以香港著名地標為主題嘅立體賽道，包括天壇大佛、大帽山、青馬大橋、啟德隧道，軌道面積達6米×8.4米，設有3條軌道，每條長150米；軌道唔止睇得，仲融合必備嘅難度關卡，例如4圈旋轉式軌道、40度上落斜台及地獄跳台等，要快又要行得穩定，考驗各位車手嘅Set車能力喇！賽事為期3天，各位車迷不妨到場觀戰。值得一提，2014年乃《四驅兄弟》（日版《爆走兄弟Let's & Go!!》）推出20周年，更加有漫畫回歸，新故事名為《爆走兄弟Let's & Go!! Return Racers!!》，主角星馬豪已經長大成人，仲生咗個仔叫「星馬翼」，睇嚟四驅車熱潮仲有排興！