主流射擊遊戲多以人類角度出發打怪獸，各位有冇諗過倒轉頭扮怪獸追殺人類？今天（2月10日）推出嘅人氣大作《Evolve》，以4打1連線玩法，想組隊成4名獵人打怪又得，想扮巨獸1揪4獵殺人類亦得，實在係過年前必玩遊戲！
《Evolve》由出晒名嘅喪屍遊戲《Left4Dead》創作團隊Turtle Rock Studios開發，喺上年E3遊戲展已獲得多個大獎，令玩家更添期待。角色設計方面，延續《Left4Dead》的個性化設計，獵人共有12個選擇，主要分成突擊、陷阱、醫護及支援4大類別，每個角色都有自己嘅主、次武器和特定能力。不過畀小記揀，遊戲收錄嘅3頭超級巨獸先至係主菜，當中Goliath具有噴火、掉石頭、超級跳躍同衝鋒攻擊，血量之多極難應付，至於可施展閃電同地雷等招式兼且識飛嘅Kraken，動作靈敏兼會設陷阱嘅Wraith，佢哋都唔易應付。
《Evolve》嘅單人故事模式比較薄弱，相比之下，4打1連線玩法至係重點，「獵殺」、「巢穴」、「救援」同「防守」模式都設計得好有特色。當中「獵殺」要扮演怪獸嘅玩家，殺死並進食生物提升能量同等級，而獵人嘅目標要喺怪獸進化得太強之前圍攻解決佢。「巢穴」則是獵人要喺怪獸蛋孵化前，將Goliath、小怪獸同怪獸蛋消滅。遊戲更收錄16張包含4種獨特生態環境嘅地圖，可演變出多種玩法。不過最有趣係「撤離」戰役，遊戲會以動態方式將各種地圖、模式、獵人同怪獸組合出戰役，每關勝負都會影響下一關雙方勢力，總計有超過80萬種可能組合，真係有排玩！
類型：射擊
開發：Turtle Rock Studios
平台：PS4、Xbox One
售價：$468
查詢電話：2528 0830
撰文：布偉倫