Hellolulu相機袋系列 形象百變
相機袋愈出愈潮，之不過好多袋款都欠缺實用功能和保護性。影友如想搵個靚袋迎接新一年，本地品牌Hellolulu的百變相機袋系列可說是不錯選擇，新系列多款多色之餘，最正係可變作行街袋使用，真係形象百變。
耐用抗水 尼龍物料
相機袋最緊要耐用，Hellolulu百變系列採用優質尼龍物料，有效抵抗水滴，而且外觀簡約，最大特色是用上捲蓋式開口設計，就算沒有扣上，都可利用魔術貼封口，提升存取器材的效率。整個系列提供4種袋款選擇，包括Poplar背囊、Lance單肩袋、Nyla腰包和Matt單肩袋，內裏用上鮮色厚墊加強保護。除了最小巧的Matt之外，其餘3款都能將內膽拆出，搖身一變成普通行街袋。
4款選擇 間隔實用
容量最大的Poplar背囊，提供黑色和橄欖色選擇，下層能存放一機兩鏡，上層亦可擺放個人物品，更設有平板或手提電腦間隔。而足以容納一機兩鏡的Lance單肩袋，同樣備有黑色和橄欖色，既有平板間隔，還提供多個小袋可放入吹塵泵等配件。至於有齊藍、黑和橄欖色的Nyla腰包，機動性較高，腰間可擺放小物，特設肩帶可變成斜孭袋。的骰小巧的Matt同樣有3色選擇，估唔到Size細細都可擺放一機一鏡。
撰文：黎子豪
攝影：方偉堅
查詢電話：3118 2892