4,000萬像素OM-D E-M5 Mark II 超強解析

高解像度拍攝

OM-D E-M5 Mark II明明用上1,610萬像素Live MOS，為何影到4,000萬像素相片呢？事關新機加入高解像拍攝功能，利用獨特原理以機械快門一口氣連拍8張，將每粒像素內的感光部分齊齊移動，從而合併成為一張4,000萬像素的靚相。廠方強調相片並非軟件插值而成，處理時間只需2秒左右，之不過其拍攝條件有所限制，由於相機要進行連拍，故此必須使用腳架，加上主體需要絲毫不動，簡單來說即係唔啱影人，建議用嚟影風景或物件。

3吋側揭式屏幕

Olympus粉絲要注意，雖然新機用上3吋多角度觸控屏幕，但唔係常用的上下翻揭式，反而改用側揭式設計，對上嗰部以此設計要數到2010年嘅E-5單反，今次首度套用在無反相機，不僅有利影相拍片作高低角度取景，亦方便翻芒玩自拍。另備有五軸防震技術，達致5級防震效果，尤其是手持拍片或Selfie時最有用，趕走多餘嘅震動。

售價：$9,590（淨機身）、$13,490（連14~150mm II鏡頭）、$15,990（連12~40mm Pro鏡）	用上263萬像素電子觀景器，取景畫面流暢且色彩鮮艷。	跟機附有一支FL-LM3閃光燈，可調校燈頭角度打Bounce。

仿OM-3復古外觀

新機沿用復古外觀，驟眼睇同上代冇乜分別，但細心會發現頂部的梯形略為收窄，原來是模仿同廠經典的OM-3菲林機，而機頂轉盤和按鍵經重新打造，金屬質感強烈，加上跟機附有FL-LM3閃光燈，輸出達GN 9.1，燈頭還可調校角度，以便向天花板打Bounce。

頂部經過重新設計，尤其是金屬轉盤極具質感。	旁邊設有3.5mm收音咪、HDMI和USB插口，強化拍片功能。	高解像度拍攝會連拍8張，然後合併成一張4,000萬像素相片。

拍片方面亦加入慢鏡和快鏡模式，而且內置剪輯功能，可為影片加入濾鏡特效、過場效果、背景音樂等，毋須過落電腦都可作簡單後期製作。

內置簡易的剪輯效果，能夠為影片加入濾鏡特效、過場效果、背景音樂等。	試相區 就算用1,610萬像素影人像都一樣掂，白平衡相當準確，成像富立體感。	14~150mm II ED MSC新鏡 售價：$5,690

規格表

感光元件：1,610萬像素Live MOS

轉換系數：2倍

屏幕：3吋103.7萬像素

快門：1/8,000~60秒

感光度：ISO 100~25,600

體積：123.7×85×44.5mm

重量：417g

同場加映：14~150mm II ED MSC新鏡

E-M5 Mark II套裝中具有全新的M.Zuiko Digital 14~150mm II ED MSC鏡頭，新鏡比起上代的外觀略為不同，尤其是變焦和對焦環經過重新設計，望落更有質感，手感更勝從前，更備有防水防塵效能，約於3月獨立發售。

HLD-8電池手柄套裝

為配合新機誕生，廠方推出全新HLD-8電池手柄套裝，一Set兩件包括手柄和電池匣，單獨加裝手柄有助強化手感，再配上電池匣可加建多一枚電池，提升拍攝續航力，並設有3.5mm插口，以便拍片時作監聽之用。

撰文：黎子豪

攝影：方偉堅、謝孝祥