透明波波 全天幕Camping
露營應該好多人都試過，雖然紮營、Campfire別具風味，但身水身汗孭住幾十磅營具上山，確實唔係個個啱玩。有冇諗過Camping都可以歎住玩？喺天水圍新開嘅名樂漁莊，特設多款特色營帳，當中最過癮係名為AEcoSphere嘅透明波波，圓形吹氣設計內裏有齊雙人大床、通風系統等，攤喺床一抬頭就能透過全天幕欣賞自然美景，二人世界夜晚數星星一流！
外國體驗親近自然
如各位有留意外國新聞，應該對歐洲熱爆嘅Bubble Hotel有印象，依家大家唔使山長水遠飛去外國，近近哋去天水圍就玩到。場地負責人表示，透明營帳嘅概念源自法國，主要以塑膠樽等可循環物料打造吹氣屋仔，讓旅客身處其中放鬆地親親大自然，既唔怕日曬雨淋，亦毋須擔心蛇蟲鼠蟻。其外形似足吹氣玩具，不過體積巨大，每個營帳佔地面積有直徑4~5米，橫排擺喺大草地上，遠睇已相當搶眼。
弧形天幕七彩燈光
外表吸睛，營帳入面仲有特色，只要通過短短嘅走廊便可進入圓碌碌嘅房間，雙人大床、棉被、枕頭、茶几仔等家具一應俱全，十足酒店套房，入住時唔使帶一袋二袋咁麻煩。要令到透明波波脹卜卜，便需以特製氣泵24小時不停充氣，所以營帳內唔會好焗，加上營內基本上與外界隔絕，唔怕被冷風吹到騰騰震。營帳最大賣點係擁有透明弧形天幕，抬起頭即可睇到四周風景，朝早日出、藍天白雲、黃昏日落，以至深夜星星都可一覽無遺，絕對係五星級嘅無敵靚景。而每個營帳都有多個七彩發光裝置，入黑便會亮起微微燈光，浪漫滿分！
半透明營帳增私隱
現時場地引入咗6個同系列的透明營帳，其中兩個以全透明設計，分別可容納2~3人嘅睡房及用餐地方。若嫌全透明唔夠私隱的話，另有4個半透明設計嘅營帳，底部以1米至1.8米高嘅白色物料覆蓋，遠睇望唔到營內景況，又能保留到透明天幕，景觀一樣咁掂；加上營帳體積更大，備有一房一廳，可以容納4~6人，一家大細或者想玩得鬆動啲就最適合。場內負責人話，遲吓半透明營帳仲會加入獨立淋浴洗手間，過夜就更加方便。
同場加映：另類Camping
除咗透明波波之外，名樂漁莊其實仲有多款特色吹氣營帳，包括蘑菇屋、彩虹屋等，Colorful嘅外形定能吸引到小朋友。講起露營，又點少得外國人勁Like嘅Car Camping呢？場地特別喺英國引入兩部露營車，車廂內有齊廚房、洗手間、焗爐、碌架床等，想體驗Car Camping的話不可錯過。此外，場內提供「蹦奔FUN充氣活動」，包括草地太空球、笨豬拉力跑等，逢星期六、日及公眾假期對外開放，$120/4小時任玩。而有蓋BBQ場地亦提供不同食物套餐，星期一至五每位$128~$168，星期六、日及公眾假期則每位$148~$188。
名樂漁莊
地址：元朗天水圍天慈路馮家圍30號
交通：天水圍西鐵站乘10分鐘的士（約$25）可達
網址：http://www.minglefarm.com
查詢電話：2891 8263
Camping收費
AEcoSphere透明波波
星期一至四：每晚$1,200（小）、$1,500（大）
星期五六日及假期前夕：每晚$2,000（小）、$2,500（大）
Caravan露營車
星期一至四：每晚$1,200（中車）、$1,500（大車）
星期五六日及假期前夕：每晚$2,000（中車）、$2,500（大車）
Fantasy蘑菇屋或彩虹屋
星期一至四：每晚$1,000
星期五六日及假期前夕：每晚$1,500
撰文：林子聰
部分攝影：張群生
模特兒：Cecilia So（Pure Models）