Stellar II夜攝享「天輪」

中環嘅摩天輪終於落成，唔少人爭住試搭之外，亦有好多人帶齊「架生」拍照，究竟點先影到靚相？Hasselblad剛推出全新Stellar II大光圈DC，一於拎住佢Snapshot試拍，配襯五光十色嘅維港夜景，夜攝共享「天輪」。

F1.8光圈手持穩定

貴氣逼人的瑞典相機品牌Hasselblad，今次Stellar II配上28~100mm的3.6倍變焦鏡頭，雖然28mm廣角唔算好Wide，但足夠覆蓋整個摩天輪，配合F1.8大光圈，就算夜晚唔落腳架手持拍攝都夠定。機身還提供夜景手持拍攝、高感光度等場景模式，就算新手都影到靚靚嘅摩天輪。若然想捕捉埋維港夜景，仲可利用一掃全景模式，只要企喺來往ifc與碼頭的天橋一掃，便能影晒附近景色。

3吋翻芒方便取景

若然想跟摩天輪親近啲，不妨走到9號碼頭對開空地以低抄拍攝，由於Stellar II擁有3吋翻揭式屏幕，能輕鬆以低角度取景，影摩天輪更為方便。想人景合一的話，相機還內置閃光燈和Hotshoe，供外加閃光燈提升「火力」。此外，新機引入Wi-Fi和NFC功能，利用對應的手機一嘟機底，再透過《PlayMemories Mobile》App即可遙控影相。

用上3吋翻揭式屏幕，以低角度影摩天輪都掂。

Stellar II由鋼琴面小木盒包裝，望落已經夠豪。

4種材質自訂手柄

可能各位會問，點解部DC仔要賣成萬幾蚊？其實除了「哈蘇」名氣夠響外，新機還加入獨特設計的手柄，提供橄欖木、紫檀木、胡桃木及碳纖維4種材質供選擇。由於手柄經由原木打磨，即使同一種木材，木紋亦各有不同，故每部相機都是獨一無二。咁貴氣嘅相機仲用上鋼琴面的小木盒包裝，跟機附有一條意大利製造的皮革手帶，盡顯奢華氣派。