變種War Game 拉弓箭鬥

7對7「無痛」互射

箭術競技遊戲無論喺戶外或室內玩都得，不過戶外冇嘢圍住，執箭都執餐死，玩多幾鋪就好冇癮，所以大多會移師室內小型足球場進行。場地會分為兩邊陣營，在5分鐘時限內以7對7形式互射，每人會帶住兩支安全箭喺身，而中間嘅安全區係用嚟執箭。「激箭」負責人Mr. Pig指出：「每邊陣營會擺放5個不同形狀嘅地堡（Bunker）作掩護，還有1個人形公仔及箭靶。勝出嘅方法有兩種，一係射中晒所有人，另一種係射跌晒箭靶上嘅6個目標。」

不過玩乜嘢遊戲都好，最緊要安全，他補充：「射箭首要姿勢正確，如果動作唔啱好容易畀弓弦彈傷手臂或者畀箭擦損手指，所以新手玩之前要用15分鐘學習射箭要點。而安全箭嘅箭頭係平嘅，再加一舊俗稱『棉花糖』軟膠，就算射落身都唔會痛。」

主要在室內足球場進行，一來能容納多人對壘，二來四面有圍網，執箭都容易啲。	裝備一覽 弓 美國製造的弓，分別有適合男士用的22磅拉力，以及女士用的15~20磅拉力。	面罩 即使遊戲中使用安全箭，但仍必須佩戴面罩，以保護面部免受傷害。

3種刺激玩法

War Game有搶旗仔、救人質等玩法，這種弓箭版War Game當然亦有類似Gimmick。Mr. Pig表示：「第1種玩法叫移動城堡，自己Set地堡嘅擺位，可排出鐵馬陣等；第2種叫國王遊戲，從隊中揀選一位做國王，國王中箭即時End Game；第3種玩法叫速戰速決，開始時雙方在自己陣營嘅底線，而弓會放在安全區，然後鬥快跑進安全區執弓攻擊，玩法有啲似《飢餓遊戲》。」

護臂 佩戴在前臂上，避免被弓弦彈傷，玩家於遊戲中不能脫下。	安全箭 由台灣製造並獲得專利的安全箭，箭頭備有俗稱「棉花糖」嘅軟膠。	箭靶 每隊會擺放一個人形公仔，黑色和白色代表各自隊伍。前陣會擺放一個箭靶，只要射跌晒箭靶上嘅6個目標便即時勝出。

輕磅弓啱女仔

射箭幾講體能，尤其是女仔可能連弓都拉唔郁，所以「激箭」用的弓經過特別挑選。「傳統嘅弓拉力較重，玩一兩鋪就會覺得攰，所以我哋揀拉力較輕嘅弓，男士約22磅拉力，女士15~20磅就拉得起，咁樣女仔上場都唔會輸蝕。」不過拉力輕嘅弓，箭速相對較慢，若然眼明手快的話，玩家可以試吓徒手接箭，Mr. Pig笑言：「遊戲中若果能夠徒手接箭，係可以復活一名隊友，但接唔到就要即時離場，我見過最勁嘅玩家喺一場Game內接過3支箭呢！」

地堡 雖然地堡差唔多有成個人咁高大，但難以同時掩護兩個人。	兩隊中間設有安全區，主要畀大家執箭，最多只可逗留10秒。	「激箭」負責人Mr. Pig，除了會指導玩家正確射箭動作，還會擔任遊戲裁判。

The Hunger Games「戲」前熱身

弓箭版War Game的玩法，不禁令人聯想到電影《飢餓遊戲》（The Hunger Games），皆因由Jennifer Lawrence飾演嘅女主角，正是以弓箭作武器，互相廝殺和挑戰強權。而新一集《飢餓遊戲終極篇：自由夢幻1》將於11月上映，各位不妨以真人版「箭」鬥熱身！

活動詳情

如對這弓箭版War Game有興趣的話，可到「激箭」facebook專頁（www.facebook.com/SafeArcheryFun）瀏覽詳情。想直接報名的話，仲可登入訂班網www.bookclass.net，搜尋關鍵詞「激箭」，便能找到預約及報名頁面。

人數：14~21人

費用：每小時$3,000

包括：場地租金、14套器材、專人指導、地堡/箭靶/人形公仔

撰文：黎子豪　

攝影：陳富權

模特兒：Charlene（Reborn Production）　

場地提供：Master5