渡海濠情：金牛男友感情專一

要數囡囡心目中最佳男友嘅條件，唔少人都會話要靚仔要有錢，但相信更多囡囡喜歡啲桄榔樹一條心嘅男友，嚟自9號會所嘅妙妙就話自己從來冇遇過，唔通真係絕晒種？原來十二星座中金牛座嘅男仔，就正正係感情專一嘅好男友！

任勞任怨

妙妙話：「我真係未遇過啲咁好嘅男朋友，但我姊妹就有個對佢好到不得了男友，我有次一問，原來佢係金牛座嘅，難怪對佢咁專一啦！呢個好男友，成日都做觀音兵，跟住我姊妹出出入入，你知我哋一出街就成班靚女，而且一啲單身嘅就會着得有咁露得咁露，但呢個好男友，竟然望都唔敢望多我哋一眼。我留意過佢，有時大家傾偈，冇辦法唔有眼神接觸，佢竟然唔會離開我哋嘅頭部，一次都冇向下望，我哋成班姊妹出嚟，個個條事業線都五、六吋長，佢都唔會多望一眼，真係服鬼咗佢，而且我呢個姊妹，出晒名脾氣臭，唔好話男人，有時大家姊妹都頂佢唔順，但呢個好男友，竟然可以頂得住，而且任勞任怨，仲半句怨言都冇，真係好男友嘅典範，所以家陣個個姊妹，都打算搵個金牛座嘅靚仔嚟做男朋友！」

對牛彈琴

講到咁好，唔通一啲缺點都冇？妙妙話：「佢哋所以咁專一，就係為人比較固執，習慣咗嘅事就唔想改變，就算捱得好辛苦，佢哋都樂於逆來順受，有咁嘅性格，對女朋友當然專一，就算當佢哋係奴隸都會心甘命抵，但缺點就係毫無情趣可言，浪漫呀！驚喜呀！都唔會發生，拍拖唔係行街食飯，就係睇戲唱K，永遠都唔會變化一下，有時悶到人都癲，最弊就係親熱時，每次都一模一樣，係嗰兩三招，就永遠都係嗰兩三招，有時焗住要囡囡主動出手，佢哋至會改變一下，但唔話明呢招以後都要用，佢下次又會行番舊路，大佬！咁冇情趣，男女感情又點可以維持落去呀？最弊就係同佢哋解釋時經常講極都唔明，用對牛彈琴嚟形容就真係最適合不過，所以除非你係冇乜要求嘅人，否則金牛座男友，諗清楚至決定！」