EXILIM FR10 「Fun」體趣味

相機的玩法來來去去都差唔多，畀盡咪翻芒玩自拍，不過向來大膽創新的Casio，近期又有新諗頭，今次唔再玩「神器」，而係玩「分體」，講緊嘅係全新EXILIM FR10，佢嘅鏡頭與屏幕可隨意合體或分開使用，玩第一身拍攝又得，自拍群拍亦得，最啱踩車、遠足或做運動時使用。

踩車郊遊<br>若然各位鍾意踩單車，跟機附有固定座以便將鏡頭安裝於單車上，以第一身視點拍攝前方景物。

踩車郊遊
若然各位鍾意踩單車，跟機附有固定座以便將鏡頭安裝於單車上，以第一身視點拍攝前方景物。

藍芽無線配對

驟眼睇合體後嘅FR10有啲似棒棒糖，圓形的鏡頭在上，長形的屏幕在下，既可直立使用，又能摺合起來。最過癮係一按屏幕旁邊的「RELEASE」鍵，兩者即可分體，畀各位一手拎鏡頭一手拎屏幕，取景角度更具彈性，而且鏡頭與屏幕各自有開關、拍片掣和影相鍵，左右手都可撳掣拍攝。由於它們透過藍芽配對，故毋須任何設定，開機即會自動連線，唔使Set來Set去咁麻煩，加上唔可以混合配對，就算跟朋友用同色同款嘅FR10都唔拍搞錯。

戶外四防功能

新機特別為鍾意上山下海嘅用家加入四防功能，包括IPX6及IPX7防水、IP6X防塵、-10度防寒和2米防撞，絕對是戶外好「拍」檔。此外，跟機附有頸帶、夾子、登山扣等配件，讓用家可隨時將鏡頭夾實背囊、綁在單車等地方，隨心拍攝不再受局限。之不過有時踩車、爬山未必可以騰空雙手，故新機支援間隔拍攝功能，每隔一段時間識得自動影相或拍片，毋須撳任何掣都能捕捉精彩一刻。

旅行遠足
將鏡頭夾於背囊，要拍攝時先拎屏幕出來，遠足便可騰空雙手。

瑜伽運動
只要將鏡頭Set定，再啟動間隔拍攝，玩緊瑜伽都可以自拍。

新機提供白、橙、軍綠3種顏色畀各位揀。

21mm廣角鏡頭

規格方面，新機支鏡似足同廠嘅「神器」，具備21mm F2.8超廣角焦段，不僅提供廣闊視野，鏡頭上方還設有一個「FREE」鍵，佢嘅用途係畀用家扭轉鏡頭外框，以切換橫度或直度拍攝，甚至可成舊拆出嚟更換外框，設計極具心思。新機提供5種濾鏡特效如玩具相機、柔焦等，亦配備美顏模式，值得一提是它內置拼貼功能，能夠將所選日子嘅靚相拼貼起來，輕鬆製作出特色照片。

除了直拉式和分拆式使用，更可摺合起來，形態似足一般相機。

FR10由鏡頭和屏幕兩部分組成，按屏幕旁邊的「RELEASE」鍵即能分體。

手機遙控操作

別以為新機玩分體，就唔可以用智能手機操控，用家只要下載《EXILIM Link》App，即可經手機遙控拍攝及傳送影像。值得留意是連線時，大家唔會喺Menu搵到任何關於Wi-Fi嘅設定，事關當用家按下鏡頭的開關及拍片鍵，便會自動開啟Wi-Fi功能，這時用家只要於手機搜尋SSID，再輸入密碼即可連線，若然用手機遙控操作，連FR10嘅屏幕都唔使拎出嚟。