Butterfly 2 雙鏡蝶變

蝴蝶經過多番蛻變才能破繭而出，同樣道理也適用於手機，於日本、台灣等地大賣的HTC Butterfly，日前終於推出第2代。繼承靚絕日系機身及5吋全高清屏幕，並加入防水功能、Duo雙鏡頭、LTE多頻模組及JBL音效等技術，基本上用家諗得到嘅佢都全部有齊，且看它能否掀起「蝴蝶效應」，助HTC再下一城！

內置奇幻背景、虛擬四季及魔法拼貼等功能，影友有排玩！

防水手感好

上代Butterfly之所以大賣，日系簡約風格是原因之一，來到第2代當然冇乜必要大改，尺寸大小相若，只是將之前放於機面的主頁、返回及多工作業的輕觸鍵移入屏幕內，令外觀更為簡潔。而機身符合人體工學設計，外形呈流線型，單手持機的手感唔錯，惟紅、藍色烤漆機殼雖然美觀，但指模污漬依舊是大敵，使用時預咗要經常抹機了。新機另一賣點是追加IP57規格，可潛入1米水深30分鐘，機身所有連接埠都經過特別處理，毋須保護蓋也能做到防水防塵，充電聽歌自然更加方便。

新雙鏡模組

廠方近年刻意強化手機拍攝功能，Butterfly 2亦唔例外，將旗艦機M8嘅Duo雙鏡模組移植過來，主鏡頭仲由UltraPixel變成1,300萬像素提升畫質，小記實試後發覺測光、白平衡及降噪都做得比之前好，以5吋全高清芒睇相真係好Sharp。藉着雙鏡頭元件，拍攝功能自然更豐富，例如可透過UFocus改變相片焦點，輕易造出淺景深效果；另可自製3D相片，或於不改變主體的情況下加入奇幻背景，女仔一定Buy！特別一提，此機的前置鏡頭也提升至500萬像素，Selfie質素有保證。

採用nanoSIM卡槽，毋須用針拮開，以指甲便能抽出來。

保留BoomSound前置喇叭，立體聲音效不俗。

兼容多頻LTE

規格方面，它與同廠M8大致相同，備有Qualcomm Snapdragon 801 2.5GHz四核心處理器、2GB RAM等，令其Benchmark得分達機王級數，撥頁、打機都好流暢，機迷應該冇投訴。此外，上代機面的兩個BoomSound立體聲喇叭都得以保留，並加入全新JBL LiveStage音效技術，使用JBL耳機時會有更佳表現。猶記得上代Butterfly只有水貨嘅關係，來到香港後冇得用4G上網，新機不但解決以上問題，更兼容多段FDD-LTE及TD-LTE頻譜，無論返內地公幹或到外地旅遊都用到4G，上網快好多！

備有紅、白、藍3色選擇，紅、藍色經烤漆處理，高貴典雅。	售價︰$5,498	前置鏡頭有500萬像素，自拍綽綽有餘！
Butterfly 2（右）比M8（左）修長，用色設計亦稍有不同。	支援NFC八達通功能，可經手機直接畀錢。