北京直擊！ 2K靚芒 Vs 曲面側屏雙Note爭妍

若手機界有四季的話，今年9月一定是春天，皆因新機百花爭妍，Butterfly 2、iPhone 6、Xperia Z3輪住亮相。韓系手機一哥Samsung當然不敢怠慢，前天於北京、紐約及柏林三地同步舉行Note 4 Unpacked發布會！Note 4本身的2K屏幕、強化S Pen及Swarovski水晶背蓋已夠搶眼，估唔到其同門兄弟Note Edge仲叫人驚喜，皆因其「曲面側屏」睇得又玩得，其他手機仲有得鬥？

Note 4 屏幕鮮艷別注水晶蓋

大芒、方角彷彿已成為GALAXY Note的代名詞，Note 4亦唔例外，齋睇外形幾乎同上代一樣，極其量只是金屬邊框變得平滑，Home掣則加入指紋掃描器，同時寬度稍稍收窄0.6mm，整體始終冇乜新鮮感。然而它強在骨子裏，例如5.7吋屏幕跳升至2K質素嘅2,560×1,440解像度，顯示更細緻銳利，另支援90%以上Adobe RGB色域，小記現場試睇時，發覺佢嘅顏色明顯較一般LCD屏幕鮮艷，成幅畫咁靚！留意屏幕還加入2.5D玻璃保護，防刮力特強，無論點篤都唔怕刮花。顏色是新機另一賣點，除了例牌嘅純白同炭黑外，仲有銅金及粉紅色選擇，嫌唔夠浮誇還可另購Swarovski別注背蓋，表面鑲滿過萬粒水晶，拎出街小心「閃」親人！

強化S Pen 操控更方便

Note系列當然有得玩S Pen觸控筆，今代壓力敏感度提升至2,048級，手寫、畫圖又快又準，最正係可如電腦Mouse般拖放文字及圖片；另強化了擷圖功能，用戶可一口氣儲存多張圖片，待有需要時才拿出來使用，比上代更人性化。處理器方面，提供2.7GHz四核心或1.9GHz八核心兩個版本，試玩時感覺流暢，就算開埋全新嘅「隨心多窗口」功能，S Note、行事曆、瀏覽器等小工具全部化成小圖示於背景待命，操控也一點沒有遲滯，可見多工處理獲得優化。針對Selfie一族，新機除了把主鏡頭提升至1,600萬像素，前置鏡頭也升呢到370萬像素，女士們只要用手指遮住機背感應器，再放手即可自拍；配合F1.9大光圈及120度廣角拍攝，同好姊妹群拍都能應付自如。

Note 4備有黑、白、金、粉紅4色選擇，將於10月上市。
售價︰待定

Note Edge屏幕比Note 4細0.1吋，並於右方加入曲面側屏，預計今年稍後時間推出。<br>售價：待定

Note Edge屏幕比Note 4細0.1吋，並於右方加入曲面側屏，預計今年稍後時間推出。
售價：待定

主鏡頭提升至1,600萬像素，並於下方追加心率感應器。

Note Edge 曲邊設計變身小工具

今年除了Note 4，最叫人意外是同門推出的Note Edge，它破天荒於屏幕右側加入曲面側屏（Edge Screen），「曲邊」解像度為160×2,560，既可與主屏幕一同工作，蓋上保護套後又能獨立運作。小記現場測試時，發覺側屏提供撥電、短訊及相簿等捷徑，另可變成間尺、計步器、倒數時鐘及錄音筆等實用工具，甚至可把個人金句當作走馬燈顯示，連閱機無數嘅小記都大開眼界！廠方指出將開放此部分的SDK源碼，讓程式員開發不同工具，叫人期待。

Note 4設有Swarovski特別版背蓋，表面鑲滿閃閃水晶。

支援懸浮指令（Air Command），操控比上代更添靈敏。

新S Pen對應《微信》，可直接畫圖記事Send畀朋友！

同場加映：Gear S曲芒上網錶

Samsung同場發表了全新智能手錶Gear S，首度採用2吋Super AMOLED彎曲屏幕，雖然錶身厚度有12.5mm，但曲面設計令它非常貼手，配合黑、白、紅、藍、灰5色，成隻未來手錶咁款。其另一破格之處是首度植入micro SIM卡，利用內置3G便能撥號和上網，換句話說有咗佢連手機都可丟埋一邊！其他功能包括指南針、心跳感應器及氣壓計等，並內置GPS及強化版S Health，至啱Keep Fit人士使用！