銀河之夏攝獵天際

暑假臨近尾聲，不僅學生要準備開學，夏季銀河美景亦快將完結！原來拍攝銀河都有季節之分，夏天會影得清楚啲和靚啲，今次一於邀請星野攝影達人Mew Chu，教大家點樣捕捉銀河，仲唔嗱嗱聲夾番日好天氣去攝獵銀河！

銀河中心夏季出沒

其實一年四季都有銀河，點解要揀夏天去影？事關每年6月至8月，位於北半球的香港，夏季會見到銀河中心於晚上出現，所以有機會拍攝到銀河全形；反之冬季大部分時間會於日間出沒，便只能影到銀河末端，星野攝影達人Mew表示：「夏季銀河會跟天蠍座、人馬座等星體相鄰，而冬季則會依傍獵戶座、雙子座等，所以唔同季節影銀河會截然不同。」

避免以手機辨方位

就算拍攝當日天氣極好，若影友單純以肉眼目測，喺香港都只會見到一層薄雲，而且銀河每晚出沒時間和方位都唔同，故不少人會以手機App辨別星位，他強調：「人眼的瞳孔遇到強光，收縮只需要幾秒鐘，而擴張則要十多分鐘，而手機的白光會刺激眼睛令瞳孔收縮，從而妨礙觀星，所以影星或觀星時應避免使用手機。建議透過傳統的旋轉星圖辨認星體，配以低刺激性的紅光照明，以便適應黑暗環境。」

手機的白光會刺激瞳孔收縮，建議使用低刺激的紅光電筒照明。

鏡頭的對焦範圍不應使用無限遠，而是設定無限遠距離再回番些少。

建議使用翻芒相機

拍攝器材方面，由於影銀河主要以仰角取景，Mew建議使用具備翻芒設計的相機，就算以低角度拍攝，影友亦毋須趴低，唔使張張相都係Eye Level取景咁悶，配合廣角鏡或魚眼鏡更可拍出震撼效果。當對準方位和選定前景便可進行拍攝，「建議使用RAW格式拍攝，調校彈性高且失真率低，以便使用《Adobe Lightroom》等軟件後製；而拍攝時應使用M Mode（手動模式），設定為30秒快門、ISO 800~1,600及全開光圈。」由於影銀河無法使用自動對焦，所以手動對焦距離應該是無限遠再回番些少，因為扭盡無限遠好大機會Out Focus，焦點回番半格才能捕捉最清晰畫面。