《薩爾達傳說》主角林克唔係呂布，「無雙」亂舞掂唔掂？其實將任何題材交到遊戲商光榮手中，就有辦法令佢「無雙」化！將於8月14日推出的Wii U版《薩爾達無雙》，林克不僅可拎長劍或弓箭，仲識拎住法杖施展火系魔法，以至戴上手套大玩流星錘，隨時以一打百！廠方仲趁未推出前不斷改良，截稿時已有10個可用角色，連薩爾達公主都可上陣殺敵。
雖然遊戲由光榮開發，但掛上《薩爾達傳說》銜頭，遊戲角色、場景同世界觀都跟足呢款任天堂名作。不過講到招式同武器，廠方繼續天馬行空，為角色加入近戰、遠攻以及魔法武器，令遊戲內容更加豐富。《薩爾達無雙》第一主角當然係林克，主軸講作為訓練兵的他，要救出被「黑之魔女席亞」囚禁的薩爾達公主，拯救海拉魯世界。只是化身成「無雙加強版」，主角除了可用上基本武器如劍及弓箭外，亦可使用法杖施展魔法攻擊，打到敵人着晒火！咁都未夠，今次林克仲可戴上手套，揮動流星錘進行大範圍攻擊，或者從地下舉起巨石砸死敵人。
「無雙」系列一向以人多勢眾見稱，冇理由得林克一個打晒，今次薩爾達公主亦會親身上陣。不過薩爾達公主所用的武器較弱，如以短劍埋身搏鬥，靠靈巧刺擊搭配弓箭攻擊，最叻係以指揮棒出魔法時，攻力較強。至於其他參戰陣容有手持太刀的海拉魯王國親衞隊隊長英帕、《薩爾達傳說：天空之劍》曾出場的劍之精靈法伊、白之魔女拉娜、黃昏公主米多娜及昆蟲王國的公主揚羽等，暫時公布咗10位可用角色。敵人陣營亦有番咁上下，除了影世界之僭王桑托及覺醒炎翼龍之外，仲有成身披上硬甲的巨型「被封閉之物」，硬攻唔得，記得要打佢腳趾呀！
要打低嘍囉做到幾百Hit其實唔難，但要打贏大佬便要掌握幾個法則，首先要找到Boss的弱點進行攻擊，例如Boss施展特定攻擊後，利用「硬直時間」出招會造成極大傷害。其次唔好遺留地圖上的道具，如執到魔法壺便可令魔力解放施展魔法攻擊，最後當然係出「超必」啦！至於遊戲系統大致跟其他《無雙》系列接近，每個角色都擁有等級，殺得愈多敵人儲滿經驗值就可升級。另外，於戰場上打低敵人會得到寶石同素材，可以用它們來製造徽章提升效果。Wii U有一樣好，就係雙打時唔使以分割畫面顯示，其中一個玩家可睇住部GamePad屏幕去打，咁就唔怕睇到唔清唔楚。
類型：動作
開發：TECMO KOEI Games
平台：Wii U
推出日期：8月14日
售價：7,390日圓
查詢電話：2359 7998
撰文：布偉倫