Wreck Diving尋船記

窺探神秘船隻

潛水歷險會PADI課程總監鍾展鴻（Ivan）表示：「其實『潛沉船』喺外國有好耐歷史，原因係海底不時會有沉沒嘅船隻、飛機或者人工魚礁，久而久之便成為另類景點。當中最有趣係潛水員可以深入海底探索神秘環境，連PADI（Professional Association of Diving Instructors）都有沉船潛水員嘅相關課程！」講咗咁耐，究竟「潛沉船」點樣玩先？Ivan表示主要分為兩種玩法，如果想優閒啲，會選擇於船身外圍觀賞；若想玩得更Pro，就可以改玩穿越，顧名思義即係深入船艙。

不過玩家除了要取得進階潛水員資格外，還必須注意安全，「穿越沉船嘅難度好高，因為要於狹窄嘅船艙進出絕不簡單，而且潛水員仲要評估船身有否下塌等危險，所以我哋一般建議喺外圍欣賞。」別以為喺沉船外圍就冇嘢好玩，原來被海水侵蝕及長滿海草嘅破爛船身，配合昏暗燈光，那種神秘感足以讓一眾喜歡探險及拍攝的玩家着迷。

「潛沉船」裝備一覽 防水電筒 落水要帶防水電筒，新款有高達1,000流明亮度，還可選擇穿透力較強嘅聚焦光線或照射範圍較大嘅散射光線。售價：$700~$900（a）

大型氧氣樽 潛沉船停留於水底嘅時間較長，建議玩家選用大型氧氣樽（左）。

海洋生物棲息地

除咗睇沉船，Ivan話要留意四周嘅生物，因為沉船大多會變成海洋生物棲息地。「鄰近西貢嘅燕子岩，海底有一艘英泥沉船，船身載有一包包英泥固然必睇，附近仲有唔少隱藏嘅海洋生物，好似藍圈八爪魚、獅子魚、海鰻等，其他海域未必見到！」不過睇還睇，他提醒各位，千祈唔好多手觸摸船身或者海洋生物，一來好易破壞環境及船身結構，二來石頭魚、藍圈八爪魚等帶有毒性。順帶一提，香港除咗燕子岩外，潛水發燒友亦可去欣賞甕缸水底嘅Jeep仔、海下灣水底嘅木架船，各有各好玩。

潛水刀 為免於海中被海草或繩網纏身，潛水員一定要帶備潛水刀。售價：$200~$500（a）	潛水旗 於船身及海面掛上潛水旗，提醒其他船隻此處正進行潛水活動。	BCD浮力調整器 背心連接氧氣樽及調節器，用來控制浮力以便於水中上升或下降。售價：$3,500~$4,500（a）
全面罩（連對講機） 近年愈來愈多人採用全面罩潛水，內裏設有對講機以便溝通。售價：$12,000~$14,000（a）

遠赴外國歷奇

香港水域嘅沉船始終較細，若想玩得更爽就一定要遠赴外國，Ivan表示：「其實近近哋喺東南亞都有唔少『潛沉船』嘅好地方，好似宿霧、帛琉等，水底有大船甚至戰機等，最正係附近水域唔算深，能見度又高，影相拍片零舍靚！」潛水裝備方面則同普通優閒潛水接近，包括BCD浮力調整器、防水電筒等。除咗傳統潛水面罩之外，唔少人仲改用近年新興嘅全面罩（Full Face Diving Mask），皆因面罩可加裝對講機，戴上後仍可以正常通話，方便聯絡水底隊友及水面工作人員，使用更加靈活。

全面罩設計與傳統潛水面罩不同，佩戴方法及鼻位反壓方法要重新適應。

潛水歷險會PADI課程總監Ivan表示：「喺外國潛沉船，一定要聽當地Dive Master指導。」

同場推介：沉船潛水員課程

潛水歷險會定期會舉辦「PADI沉船潛水員」課程，當中提供理論課程如潛沉船計劃及裝備使用技巧等。留意此課程屬專修課程，潛水員必須考獲PADI進階開放水域潛水員檢定卡或相關證書方可參加。

課程費用：$1,320（a）

精選書籍

Ivan建議大家買本漁護署推出嘅《香港石珊瑚圖鑑》，可以知道香港各處珊瑚位置。售價：$120（b）

《香港人工魚礁與岩礁魚類》會 列出香港嘅人工漁礁位置及用途，當中亦有人工沉船。售價：$60（b）

撰文：林子聰

攝影：謝孝祥、郭凱敏（部分相片由受訪者提供）

模特兒：Kate（Zmodel）

查詢電話：（a）2572 2138、（b）2334 7217