Slacklining 碼頭旁的平衡時空
近排人人談論巴西足球盛事，連洪永城同翠如BB早前都去咗巴西一趟，當中有一幕洪永城試玩新興運動Slacklining，結果跌到一仆一碌。原來這項譯為「走扁帶」的平衡運動，喺香港都有得玩，只要將扁帶綁喺兩條柱或樹之間，就可以喺上面行、跳甚至玩花式，今次請來「Slacklining Hong Kong」facebook版主Vicky，分享吓呢樣運動有乜咁好玩！
10號碼頭玩得Free
Slacklining可說是從走鋼線運動改良而成，於歐美興起再慢慢發展成Tricklining（花式走扁帶）、Highlining（高處走扁帶）、Waterlining（湖泊走扁帶）等。自2012年起，Vicky聯同一班志同道合人士，每逢星期二晚喺中環10號碼頭對開位置玩，她表示：「我哋其實去過公園、沙灘等地方玩，但好多時會畀人趕走，而中環10號碼頭勝在冇王管。每次我哋會先喺facebook點齊人數，有來自德國、法國、英國、日本、澳洲等唔同人士參與，當然亦有唔少香港人啦。」
入門3大要點
大家唔好睇小呢條扁帶，小記試咗幾次企上去都搖搖吓跌番落嚟，Vicky話有天分、學得快嘅話，幾個鐘就可以喺上面行，仲即場傳授三大竅門。「首先要注意Focus，唔好淨係望住條繩，而係望較遠嘅位置；其次是收腹，加上背要挺直保持平衡；最後膝頭要微微屈曲。走扁帶係一項全身活動，不僅能訓練腳力，改善膝頭關節，仲可鍛煉專注力，對女仔嚟講仲可以收身。」
上山挑戰難度
走扁帶有多種玩法，初學者適合喺沙灘或者碼頭跟佢哋玩，首先要學喺扁帶上企和行，當成功掌握後便可以試坐，甚至試吓彈跳。Vicky續道：「熟習後又夠膽的話，甚至可上山或到湖泊玩，我哋試過喺太平山玩Highlining，又到過西貢鹿湖玩Waterlining，由於有一定危險性，所以必須佩戴安全帶。」
洪永城玩後感
喺《走過足球聖地》節目入面，玩過走扁帶嘅洪永城表示：「Slacklining基本企上去已經好難，因為條繩唔實淨，會左搖右擺，好難Balance，再高層次啲喺上面坐同彈，再勁啲當然係玩花式。雖然我當時喺沙灘玩，但條繩Set到差唔多心口咁高，跌落嚟都幾痛，不過能夠貼近大自然，感覺值得一試。」
新手初體驗
香港的走扁帶活動只屬興趣小組性質，並無正式課程，若然大家沒有扁帶又想試玩的話，可到「Slacklining Hong Kong」的facebook專頁留言報名，他們大多定星期二晚7:30pm~10:00pm於中環10號碼頭舉行活動。版主Vicky預計人數後，會象徵式向每位參加者收取$20費用，所得款項會捐至「成長希望基金會」作慈善用途。
網址：www.facebook.com/SlackliningHongKong
高難度動作示範
來自墨西哥的Ricardo玩咗兩年，已經練得一身好身手，更表示走扁帶有助爬山、攀石等運動，佢即場示範幾招拿手好戲畀大家睇。
走扁帶裝備一覽
走扁帶的裝備相當簡單，只需一套扁帶便可以玩，而扁帶有粗幼之分，用途各自不同，粗者闊1.5吋至2吋，適用於玩花式，並會跟一組棘輪（Ratchet），用作緊扣和調校扁帶的鬆緊度；幼者有1吋闊，受風阻影響較小，適合玩Highlining，不過唔會跟棘輪，而用行山扣及繩索固定。大家亦可額外購買Treewear，以便綁喺柱或樹身，減少扁帶的磨蝕和損耗。
網址： gibbonslacklines.com、pureslacklines.com
撰文：黎子豪
部分攝影：盧展程
模特兒：Seacole（Reborn Production）