台灣直擊！Acer自建雲串聯數碼生活

《西遊記》孫悟空喺香港人氣麻麻，但當佢去到台灣搞雲端，反而博得全場掌聲。事關Acer剛於桃園龍潭渴望園區研究園為自建雲體驗中心揭幕，搵嚟古今齊天大聖鬥法，以七十二變比喻自建雲（Build Your Own Cloud，簡稱BYOC）技術，輕鬆以家居電腦打造個人雲端中心，無論數據容量、存取速度全部可以自己話事，同場孫悟空更升呢成官方吉祥物「ab大聖」，以abApps法寶管理生活！

abApps 專屬軟件

自建雲的構思，是以Acer Open Platform來打造雲端中心，用家可利用跨平台裝置同步串聯自己的音樂、相片、文件等，並保持高度私隱和安全性。當中全靠專屬abApps（代表Acer BYOC Apps）幫手，發布會以家居場景展示應用方法，如連結家中音樂庫，以abMusic即時串流心水Playlist，並以abPhotos將手機相片收錄到PC上，方便搜尋欣賞。最過癮莫過於利用abClipboard分享功能，呢頭將手機所拍嘅照片抄低，嗰頭在平板電腦複製字串，通過網絡連結於PC上即時整合，夾份做Project時最啱用！

連接雲端瞄準車用

另一樣巴閉的，是自建雲夥拍車用軟件商ATS與Studio X-Gene，以Acer的雲端平台為智能汽車建構資訊系統。ATS仲設計咗一個車匙形接收器，當日喺Connected Car展區吸引咗唔少人搶住試，呢個系統可利用雲端來儲存駕駛者的駕駛喜好及行車紀錄，當好似車匙咁插入並啟動汽車，儀錶板便會讀取相關資料，顯示駕駛導航、天氣情報、最近愛聽的音樂等。至於Studio X-Gene則模擬雲端傳送電動車狀態，再利用手機App提醒駕駛者如充電建議、車門未有關好等，將自建雲技術攻入車用市場。