F1.8光圈RX100 III 觀景器型到彈起

數碼相機愈出愈細部，而功能卻愈趨專業，好似網上流傳咗好耐嘅Sony新一代Snapshot王RX100 III，近日終於抵港。作為三代目，新機最特別是加設彈出式電子觀景器，平時隱藏於機身內，有需要時一按彈起，以口袋機嚟講真係又Pro又慳位，難怪叫價高達$6,290！各位想入手的話，記得於5月28日至6月8日到官網（www.sonystyle.com.hk）預訂，大約6月中正式上架。

售價：$6,290

內置閃光燈設計

驟眼睇RX100 III個樣同上代冇乜大分別，其實變動藏於骨子裏，尤其是0.39吋彈出式OLED Tru-Finder電子觀景器最搶眼，採用蔡司T*防反光塗層鏡片，取景時色彩還原度高，加上用家能因應需要，自行調校觀景器亮度和色溫，令顏色表現更準確。當彈起並拉出觀景器後，屏幕LiveView便會自動關閉，設計貼心，而用家影完相收納觀景器時，仲會自動幫你關機。新機另一變動是上代的Hotshoe位置改為內置閃光燈，雖然擴充性略為下降，但於昏暗環境影相時絕對幫到手補光。

搭載24~70mm鏡頭

唔少用家反映過上代28~100mm鏡頭唔夠Wide，廠方果然有聽取用家意見，於新機改用24~70mm的2.9倍變焦鏡頭，而且支援F1.8~2.8光圈。雖然新鏡焦距縮短，但廣角更Wide，還配備F1.8最大光圈，喺唔夠光嘅環境影相大派用場；鏡頭外圍更設有操作環，調校拍攝參數更直接。大光圈的好處是易玩淺景深，但身處猛烈陽光下容易導致曝光過度，故機身增設ND減光濾鏡，能夠進行三級減光，柔和散景手到拿來。今時今日，影完相最緊要Share上網，新機擁有Wi-Fi和NFC功能，用家透過《PlayMemories Mobile》App便可經手機遙控拍攝和過相。