Enterbay旗艦店 群星Chok爆登場

千呎總店更好行

自NBA系列Figure獲得成功後，Enterbay近年積極拓展版圖，先於上海開設分店，其後再攻陷北京，將本地Figure文化帶到內地。經過一輪「北伐」後，廠方日前將旺角總店擴充至千多呎，讓玩家逛得舒服之餘，還有更多地方陳列各式RM 1:6及HD 1:4 Figures。小記於開幕時所見，現場新舊作品兼備，舊至李小龍、戇豆先生，新至《救火英雄》霆鋒及樂仔、《RoboCop》鐵甲威龍及《胭脂扣》十二少等都有，之前向隅的粉絲不妨到場望梅止渴。

Enterbay副行政總裁Natalie表示，新店投資了七位數字，希望客人有賓至如歸感覺。

微笑Look神似度較高，但廠商話會再細執。

一字馬尚格雲頓

新店開張，不但吸引到一班明星玩家如方力申、關楚耀、麥長青等到場湊熱鬧，製作團隊更率先展出多款Figures試辦，當中最矚目首推尚格雲頓。它不參考電影造型，而是以佢老哥現況為藍本，一身皮褸、黑褲配墨鏡，同新店的黑白裝潢襯到絕。製作團隊表示，由於尚格雲頓要求極高，因此頭雕、素體經過多番修訂，既要減少老態，又要爆肌兼靈活。小記試玩時，發覺其雙腿可靈活做出一字馬，要擺出經典貨車廣告甫士可謂話咁易。

林書豪Figure穿上火箭主場波衫，最快5月中發售。售價：待定

頭雕經過尚格雲頓親自監修，難怪如此像真！

林書豪試辦首現

雖然火箭隊喺NBA季後賽首圈出局，但各位想見林書豪的話，佢嘅Figure預計5月中便能與大家見面。試辦披上休斯敦火箭主場波衫，附有微笑及剷籃兩款頭雕，前者神似度較高，可惜素體略嫌太大隻。幸好廠商表示為盡善盡美，出大貨前會再執。特別一提，新店開幕後會一併改善交易系統，追加積分回贈計劃，客戶每購物滿$30可獲1分，日後再購物時可當作折扣，實行讓玩家買得多、平得多。

尚格雲頓雙腿可靈活做出一字馬，若加兩架貨車模型便可重現廣告經典甫士。售價：待定

導演郭子健參與整個開發過程，務求每一Part都盡善盡美。

名人專訪：任達華激讚 1:6救火英雄

香港有唔少明星都曾被Figure化，但若論次數，任達華必入三甲，唔計土炮作品，攞正「拉臣」出嘅有《機動部隊》Sam哥、《風雲2》絕無神。而Enterbay宣布將推出《救火英雄》壓軸作、華哥飾演的消防總隊目李培道之Figure，由頭雕到裝備都幾可亂真，難怪華哥睇過試辦後大讚：「雖然佢係膠質，我冇膠質，但真係100%似，尤其係雙眼同堂眉捕捉得非常好，流露出角色堅忍、有耐性一面。」佢話會買多幾隻放喺香港、新加坡及英國屋企，好讓日後邊玩邊回味拍攝過程。

華哥稱讚Figure最似係堂眉，同佢真人一樣咁英！	氧氣筒、支架、肩帶及金屬扣全部有齊，製作認真。	另送面罩頭雕，內藏LED燈，亮起一刻更有氣氛。
小方及Donald是Enterbay忠實擁躉，新店開幕當日齊來到賀。	Donald	新店擴充至千多呎，讓各位有更多地方買Figure之餘，行得更舒服。
開幕日的重頭戲是Michael Jordan簽名Figure拍賣，結果以$48,000成交。

配件一絲不苟

《救火英雄》名句「戰勝煙，便要比煙更毒」，戲中華哥常把香煙放於頭盔內警惕自己。這件咁重要的道具，廠方當然如實炮製出來，華哥表示︰「電影講人定勝煙，所以Figure跟埋火柴同兩支香煙配件，不但設計得好周到，仲勾起觀眾不少回憶。」勾起回憶嘅還有一身消防制服，包括防護頭套、內衣、外套及吊帶長褲，表面全部經過舊化；另有頭盔、救生繩、金屬製氧氣筒連呼吸器等配件，製作一絲不苟。導演郭子健補充︰「整個開發過程，我同華哥都有畀意見，例如要表現華哥英氣之餘，消防制服又要造得神似，而且Figure靈活性要高，經過多番修改試辦才完成。」

撰文︰陳志滔

攝影︰郭凱敏、林資凱

查詢電話：2332 3615

地址︰旺角廣華街1號仁安大廈地下12號舖