仲有兩個月，世界盃正式開鑼，球迷和機迷識得玩嘅話，梗係乘機煲《2014 FIFA World Cup Brazil》。高像真度嘅球星、球場、波衫等不在話下，新作除咗可以畀大家從203支球隊中，任揀一隊由外圍賽打到巴西外，仲特設「Story of Finals」模式，讓各位嘅愛隊有機會大平反！
《2014 FIFA World Cup Brazil》遊戲引擎及操控建基於大受好評的《FIFA 14》之上，不過今集都有進行微調，其一是加入「Over-the-Back Headers」動作，球員可以加少少超技術，壓贏前方球員爭頂頭槌。其次是改進了12碼系統，球員會圍在禁區等候12碼被撲出後的補射機會，而且龍門更可做出騷擾動作，如在白界前左右移動令主射球員分心。操控方面，今集引進「Response Dribbling」同「Pinpoint Passing」令盤球同傳送更真實，做到更精準動作。
遊戲最強賣點是夠真實，由波Boot、球衣、球員到球場資料，都有咁真做到咁真，有晒「拉臣」開發。新作仲用上今屆世界盃指定足球adidas Brazuca，可能機迷都要同真實球員一樣，要花少少時間適應新波嘅物理表現。遊戲收錄了7,469名球員、12個真實舉行世界盃的巴西球場，可能畫面仲靚過趕緊工嘅真實球場，連球員所穿着的波衫都是最新款式。另一有趣地方係當入波後，鏡頭會即時Pan到世界各地街頭，好似倫敦特拉法加廣場同莫斯科聖巴素大教堂等，睇吓各地球迷嘅反應。
雖然巴西世界盃得32強，但玩家於「Road to FIFA World Cup」模式，便可從203支球隊中，任揀其一從外圍賽打起。至於「Road to Rio de Janeiro」連線模式就更加有趣，可將12個比賽地區分成唔同等級，想跳到下一區作賽，便要在該區聯賽出線，打得好就「升班」，目標係要入到里約熱內盧的馬拉簡拿球場爭奪世界盃，玩法其實跟《FIFA》系列嘅聯賽模式幾似。作為球迷都會明白，有時睇完場波嘅直播後，真係谷埋成肚氣，故新作加入「Story of Finals」，每場真實比賽完場後一個鐘，遊戲便會上載該比賽的挑戰任務，玩家大可利用手掣去為愛隊平反。
類型：運動
開發：EA Sports
平台：Xbox 360、PS3
推出日期：4月15日
售價：$449/各
查詢電話：2359 7998
撰文：布偉倫