inFAMOUS Second Son超能力抗強權

動作冒險遊戲《inFAMOUS》系列叫好又叫座,PlayStation自然會喺新主機平台推出新作護航,但上集其中一個結局係主角Cole壯烈犧牲,所以來到《inFAMOUS Second Son》,便換來戴冷帽嘅年輕人Delsin擔正。佢嘅超能力比Cole有過之而無不及,用上Neon Power可高速飆上屋頂,以Smoke Power可使出強大攻擊,在PS4機能加持下,遊戲場景同動作畫面都有極高質素。

西雅圖真實場景

早兩集《inFAMOUS》主角Cole,某程度唔係好受落自己嘅超能力,今集新主角Delsin就完全唔同,故事講佢從女角Fetch身上取得超能力後,肆無忌憚地使用能力執行任務,風格明顯同前作唔同。有人話《inFAMOUS》係超能力版《GTA》,可以喺開放世界之中冒險,而新作今次仲唔玩虛構城市,成個遊戲版圖跟足西雅圖去描繪,著名景點如Space Needle電視塔都有登場,由於開發公司喺正西雅圖對岸,準確度及仔細度毋庸置疑。

Touch Pad轉能力

今集以Cole自我犧牲作前提,描述7年後的世界,民間組成超能力者隔離機構「聯合保安部(DUP)」,四處捉拿超能力者,帶點反叛的Delsin遂起來反抗。暫時所知,Delsin會擁有兩種超能力,以啡色顯示的Smoke Power,跟以紫色顯示的Neon Power,前者擁有較強戰鬥力,不過行動力較弱;相反Neon Power就可高速橫衝直撞,90度角爬牆衝上屋頂話咁易。不過無論使用哪種超能力,都要靠隨機打爆物件而出現嘅超能力藥劑補充至得,玩家透過DualShock 4手掣上的Touch Pad便可轉換能力。

做壞人玩得更爽

在PS4機能加持下,無論人物描繪或城市實景都造得好仔細,如Delsin的大頭鏡頭真係見到鬚根,城市霓虹招牌跟地面反光位都勁靚,即使在高速移動場面下,用粒子效果營造嘅氖氣電離效果都做到真嘅一樣。《inFAMOUS》系列一大特色係可以畀玩家選擇「正義」或「邪惡」路線去完成遊戲,除咗能夠喺過場動畫揀正邪選項外,在街道戰場上如只擊中敵人腳部制服對手,便會增加藍色正義值,但Head Shot或打死敵人就會增加紅色邪惡值,正邪數值會影響主角所使出嘅超能力及後續故事。開發小組話,《inFAMOUS 2》差唔多有八成玩家都揀「正義」,但玩時掣肘比較大,如想玩得更Free,不妨試吓做壞人!

DETAILS

類型:動作冒險

開發:Sucker Punch

平台:PS4

推出日期:3月21日

售價:$388(普通版)、$508(典藏版)、3,780(PS4同綑版)

查詢電話:2341 2356

撰文:布偉倫 

部分攝影:陳富權