Xperia Z2東京試拍 4K銳不可當

近年智能手機界猶如戰場，要突圍而出梗係唔可以慢吞吞出機。Sony啱啱喺西班牙MWC展出機王Xperia Z2，轉過頭已經喺日本總部有得試玩，新機最正係強化咗拍攝功能，2,070萬像素影相掂之餘，仲可以玩埋4K拍片，小記喺東京街頭實試，畫面銳利清晰，連接大電視睇片都冇起格，真係要講番句「識得玩梗係玩Z2」！

售價：待定

換上5.2吋芒

第一眼見到Xperia Z2，好多人都唔覺佢同上代Z1有乜分別，皆因新機沿用Omni Balance平衡設計，機面和機背同樣用上強化玻璃，亦有番以往黑、白、紫3種配色，驚喜不大。原來廠方喺設計上做咗唔少微調，全高清屏幕由上代5吋增至5.2吋，除咗機身比上代長咗少少之外，闊度、厚度、重量都不增反減，手感更舒服。屏幕連質素都有所提升，於TRILUMINOS Display for Mobile技術外，另加入Live Colour LED新技術，令顏色更鮮明，小記用肉眼比較兩代Xperia機王，發現Z2顯示風景好Sharp，而轉睇人像時膚色又唔會變得過紅，效果亮麗自然。

高質素4K影片

上年Z1靠2,070萬像素鏡頭成功吸引不少用家轉會，嚟到Z2又點可以冇新功能呢？鏡頭用上比一般手機大的1/2.3吋2,070萬像素感光元件，配以F2.0大光圈，試拍時對焦快而準，而且色彩還原度高；加上Steady Shot影像穩定技術，令手震情況大減，影夜景就最啱。最吸引是支援4K攝錄功能，可以拍出每秒30格、解像度達3,840×2,160影片，影像層次分明，齋喺手機度睇片固然靚，連輸出至大電視都一樣咁清晰；但由於解像度太高嘅關係，拍1秒已經要大約7MB，睇嚟要買定張高容量microSD卡作擴充喇！

3款配色同上代一樣，相信紫色都係熱搶之選。

搭載5.2吋屏幕，加上Live Colour LED技術，顯示色水靚咗好多。

特效拍攝功能

廠商今次仲落咗唔少心思喺特效拍攝方面，好似「TimeShift影片」可將部分片段玩超慢動作，影動態主體零舍過癮；「背景散焦」會喺拍攝時先鎖定主體，用家一Drag即可隨意改變景深；「AR效果」就由影相搬埋過去拍片，可將虛擬卡通結合實景拍攝，內有恐龍、蜘蛛俠等效果，仲有埋相關音效配番。規格方面，新機換上Qualcomm Snapdragon 801四核心處理器，加上記憶體由上代2GB增至3GB，配合Android 4.4作業系統，操作勁流暢。另首次加入「簡易首頁」，將一般介面轉成超易用嘅大格仔圖示，方便一眾唔熟Smartphone嘅用家。