instax SHARE SP-1 Phone狂印相

很多影友及潮人鍾意玩即影即有，貪佢能即時攞住張相睇拍攝成果。如果想喺手機都玩到即影即有Feel，就要試吓Fujifilm新推出嘅instax SHARE SP-1流動相片打印機，它可透過專用App編輯兼打印手機靚相，印一張相約16秒搞掂。最正係佢用上同廠instax mini菲林，效果激似即影即有，粉絲必Buy！

方包外形便攜

第一眼睇SP-1，好多人會被佢嘅外形吸引，弧形頂部配純白機身，驟眼睇似足一片方包，設計幾Kawaii。機身貫徹簡約風格，只有左右兩組燈號，左邊10盞燈用嚟顯示剩餘菲林張數，右邊3盞則顯示電量。話明主打流動性，新機設計當然不能累贅，唔連電池、菲林嘅情況下僅重253g，仲輕過同廠招牌instax mini系列即影即有相機，擺落袋帶出街都唔怕重。

直印面書靚相

同大部分流動打印機一樣，新機引進Wi-Fi功能，用家將手機、平板等連接相關網絡後，即可進行配對，過程簡便。不過打印相片就要靠專用App《instax SHARE》，用家可直接揀選智能裝置內的相片。較特別係提供「實時模板」功能，可經手機即時影相之餘，相片會自動印埋日期、時間、地點、溫度、濕度等拍攝資訊，咁就唔怕唔記得喺邊度影啦！用家亦可打印facebook、Instagram相簿內嘅靚相，順便印埋「Like」嘅人數，玩味爆燈。

售價：$1,680
機身設計簡約，打直擺似足一片方包。

轉用instax mini卡通主題菲林都掂！

左右兩組燈號分別代表菲林剩餘張數及電量。

全程16秒搞掂

《instax SHARE》亦內置簡單後製功能，包括影像編輯、過濾器和模板等，前者可將相片旋轉、放大、移位等；而過濾器則提供懷舊、黑白兩種濾鏡；最好玩要數模板，皆因用家可將相片保留原有比例之外，還可轉為方形比例，兼且喺相片下方添加文字；最搞鬼係有一個限量模式，可於相片印上最大100的號碼，扮限量版送畀人。小記現場試玩時，約16秒便完成打印過程，速度都算快，驚喜位係以前玩即影即有相機，相片有機會鬆郁朦，今次用上instax mini菲林就清晰得多。值得一提，機側特設Reprint鍵，一按即可重複打印同一張相，聚會時便可印多幾幅分畀朋友。

以兩枚CR2電池便足夠打印約100張相片，相當襟用。	揭開機底即可更換菲林，非常方便。	機側備有Reprint鍵，毋須任何設定便可重印相片。
《instax SHARE》App備有iOS及Android版，手機平板過相啱用。	「實時模板」會顯示拍攝日期及地點等，最啱用嚟整遊記。	喺Instagram及facebook攞相打印，仲會印埋有幾多人Like。
內置濾鏡只有兩款，若能加多幾款就Perfect喇！	主介面採用方格顯示，簡單易用。	試相區相片色調幾有即影即有Feel，不過細睇會發現成像比傳統菲林機更清晰，效果有驚喜。