Henry Lau打造星星的人

在舞台上的最大挑戰，Henry指大前提是不能影響歌手唱歌，在歌手表演的幾分鐘內服飾不可以阻礙唱歌。他形容舞台的服裝設計對他來說是甜品，同樣是一望無際的領域：「Designer鍾意做自己collection，我鍾意普通人着我嘅衫，而舞台衫係冇boundary，可以creative，任何事都會發生，最重要唔好阻佢哋唱歌。」而他最難忘是幫梅姐（梅艷芳）做歌衫，與張國榮卻是惺惺相惜。

難忘好哥哥

設計師要與藝人建立一個良好友誼關係並不是易事，Henry自1997年幫張國榮（哥哥）做演唱會衫後，二人一直合作，哥哥更不時給予Henry設計上的意見，令Henry受寵若驚，他大讚哥哥似足一位前輩級的設計師，意見一針見血，更透露有一次相約哥哥吃飯，哥哥的舉動令他非常感動及驚喜，他說：「有次同佢一齊食飯，我着咗件我collection嘅fur，哥哥就話『你做乜着咗我件衫』，我就好驚啦，佢話『聽日出記招，搵咗呢件衫好耐，搵咗幾個星期，你依家除落嚟畀我』，咁我就除畀佢，我嗰晚仲特登畫咗點樣襯嘅圖畀佢，第二日佢真係照樣着埋出嚟，仲搵人send報道我睇話自己好聽話，我真係好surprise，佢真係好哥哥。」他直言現在已經很少藝人會為一個記招而去找一件衫，甚至為出一個活動而去找專人做衫，相反只會在演唱會時才會去做歌衫。

Henry（中）參與貿發局的「華麗秀」，倫永亮（左二）及李克勤（右二）鼎力幫忙。

Henry對一切的際遇形容是機緣巧合。

對於Henry來說從沒有遇過江郎才盡、靈感乾涸的時候，因為他一向保持一顆年輕的心：「我同自己講我仲係一個好young嘅設計師，唔好將所有嘢都take it for granted，remind自己係新人，當嗰時冇錢買料，就會見到垃圾袋嚟做衫，但有錢時，根本唔會見到垃圾袋。」每個人總會有一天退下來，他笑言：「會keep住做衫，唔工作會腦退化，年紀慢慢大，可能會做少啲衫，幫一兩個藝人做。同埋我依家搬咗去西貢，得閒種花，退休咪種花耕種，個感覺都似做設計嘅喜悅。」

Henry（右）不時幫李克勤做歌衫。	梅艷芳的歌衫性感有型格。	Henry（左）與合作夥伴Paul Chau難忘張國榮（中）的真性情。

台上一分鐘 台下十年功

在不少紅館個唱都會看到他筆下的剪影，他是本地炙手可熱的時裝設計師，是為不少歌手製造攝人衣裳的劉志華（Henry Lau）。自小熱愛畫人像的Henry，原想中學畢業後到法國讀畫畫，但因家人覺得畫畫沒有前途而反對，最後他留港讀設計，亦因時裝設計與畫人像差不多，而選讀該科目。Henry1995年畢業於香港理工大學，但在求學時已經跟隨著名設計師陳華國做助手，接觸不少舞台演唱會的服裝，他就由釘珠繡花開始做起，第一個找Henry做歌衫的就是夏紹聲，當時Henry仍然是一名學生，他說：「佢好支持學生嘅設計，會畀機會新人，所以佢會搵學生幫佢做衫，嗰時我已經有做歌衫嘅經驗，機緣巧合之下就幫佢做衫。」

複雜的行業

畢業後Henry套用了舞台歌衫的元素融入晚裝設計，創立個人品牌SPYHENRYLAU，得到歌手李克勤及周杰倫等追捧，同時亦愈來愈多人上門找Henry做歌衫，短短幾年已經幫張國榮、梅艷芳等巨星做演唱會歌衫，平步青雲。與其說Henry是幸運，倒不如說他一直都在裝備自己，等待機會來臨的一刻。

由Henry立志做設計師的時候，他知道時裝是一門複雜的行業，由布料的運用到時裝騷上的音樂都要一絲不苟，初出茅廬的Henry為巨星設計歌衫，起初認同感並不強，亦有擔心的時候，Henry直言最重要是去說服客人，而他堅持每次為歌手做的演唱會衫都會做多幾套，以免出錯，他說：「通常要兩個月製作時間，有時候十個形象可能最後客人只會揀五個，同artist有商有量，做好兩手準備，做designer係要serve一個客人，令佢更靚，我會接納藝人意見，呢個係自己嘅優點。」

要產生火花

他認為與藝人合作是講機緣巧合，無論是當紅的國際巨星或是新進歌手，最重要是穿上服裝令二人產生一種微妙的火花，令人有「嘩」的一聲，所以他喜歡幫新進藝人設計形象及服裝，可以因服飾而令對方大紅大紫，而感到快樂。因為有經驗，Henry現在對着任何歌手都可以駕輕就熟去設計歌衫，而設計的歌衫就正正是舞台上展現一分鐘，台下製造的過程就用了他十年的功力。

克勤獻處男騷

Henry應香港貿易發展局之邀參與「香港‧華麗秀」展示最新的時裝系列，他指自己的靈感以故事為主，這次以一個平凡女生闖蕩荷里活的故事，活生生地展現在舞台上，將平凡人變成明星。相識滿天下的Henry，得到一眾名人好友支持，歌手李克勤更奉獻第一次行騷給Henry，演繹他最新的系列，倫永亮更為他的時裝表演擔任音樂製作及現場鋼琴伴奏。

採訪：李詠林

攝影：沈健程