舊機有價！趕搭Trade-in尾班車

Trade-in篇：連鎖店靚價舊換新

好多人買手機都會去大型連鎖店，除咗信心大啲之外，好大程度因為佢哋提供Trade-in舊機回收服務。最近網民發現百老滙開出超高回收價，小記當然走訪各區門市一探究竟，原來佢全線做緊Trade-in推廣，只要購入指定機款如LG G2、Sony Z1或HTC One Max等，舊機回收價即時提高近$1,500。以截稿前舊款GALAXY S2為例，原本只收$720，但喺推廣之下回收價竟變成$2,220；假設各位想買原價$5,198（截稿前價格）嘅LG G2 32GB，即係只要補$2,978就搞掂。雖然回收價高，但店員提醒各位，換機前記得Backup舊資料，而且佢哋會檢查舊機是否操作正常，爆芒、壞Home鍵、入水、脹電等均恕不接受。最重要係推廣優惠隨時結束，有興趣就快啲出手喇！

想將舊Gadgets換成其他家電？咁就要睇埋豐澤Trade-in服務。它特別在除咗回收手機外，仲接受MP3機、Notebook、DV、手提遊戲機、相機共6種產品；之後便可換購9種產品包括手機、相機、電視、洗衣機及雪櫃等。小記問過店員，iPhone 5嘅回收價雖然得$3,050，但勝在Trade-in產品種類夠多，仲有媽咪最Like嘅家電揀。

放大圖片

放大圖片

先達放機篇：iPhone依然最保值

想賣走舊手機，唔少人都會諗起旺角先達廣場，皆因場內很多店舖提供二手買賣服務。G-World手機店負責人Lo哥表示，先達對回收嘅手機會檢查得特別仔細，好似機身刮花、屏幕「烙印」、篤芒靈敏度等問題，都會相應扣減價錢，如機身太殘舊亦會扣$200~$500。他補充：「依家行貨、水貨，有盒、冇盒其實對回收價冇乜大影響，反而水貨機一旦有SIM Lock，回收價隨時少$1,000~$2,000！」而最保值的手機，Lo哥首推iPhone系列，例如推出逾一年嘅iPhone 5及iPhone 4s，回收價分別達$3,700及$2,400；其次Samsung GALAXY S4及Note 2，回收價亦有$2,700及$2,100。

網上交易篇：買賣講信用

嫌「先達」收機價唔夠高？其實各位可利用網上二手平台放機，簡單嚟講，賣家直接喺網上平台同買家聯絡，較為人熟悉嘅例子有Yahoo!拍賣、DCFever等。DCFever網上業務總監Ricky表示：「網站二手買賣區提供免費平台，賣家可以刊登想賣嘅產品，而買家只需透過傳訊息或留言，即可聯繫對方，過程直接，最重要是買賣價錢一般較二手店高。」網上平台看似方便，但Ricky提醒大家：「C2C（Consumer To Consumer）始終講個『信』字，所以買賣前最好參考對方嘅信用評分及評價。此外，賣家描述產品時，最好形容得具體一點，例如『九成新』即係幾新呢？皆因機身的新舊程度、花痕等都屬主觀看法。事前交代清楚，免得約好晒地方交易才口同鼻拗。」

（手機售價、收機價以連鎖店及手機舖作準）

撰文：林子聰　

部分攝影：陳世昌　

模特兒：Miki