到連鎖電器店，有趣的不但是買得心頭好，為贈品討價還價的過程，也相當有趣。
那天，和太太買洗衣機，花完一輪唇舌在價錢上，我們開始轉攻贈品。我帶着蠱惑的眼神問那殷勤的小生服務員：「有咩贈品送先？」他說：「呢期我哋送得意水杯！」我說：「唔好再畀水杯我，我屋企嘅贈品杯多到可以擺幾圍酒！」
小生再說：「還有熨斗和熱水煲。」饅頭媽說：「熨斗已有。」小生便拿出一個酒店用的小型熱水煲出來，我問他：「咁細個水煲，有咩用？」他開始支吾以對：「可以出門用！」我說：「邊個會帶熱水煲出門？」
小生額頭開始冒汗，饅頭媽便乘機追問：「你仲有咩可以送？一定有嘅！」 我將頭靠近一點，輕聲說：「嗰啲小型蒸氣機有得送嗎？」小生說：「嗰啲冇！」我再問：「咁你哋推介緊嗰隻多士爐呢？」小生有點戰戰兢兢：「嗰個唔可以送！」饅頭媽故意裝出不耐煩：「咁點算呀？你送埋啲唔等使嘅嘢畀我哋，都無用嘅！」
小生見我們死纏難打，突然說：「有，你哋等等！」他便極速走入貨倉，我以為他會拿出甚麼秘密武器如記憶卡、超市現金券等出來，殊不知，他竟然拿了一包5公斤裝的白米出來，還表現得極度神氣：「呢個OK喇啩！」
正當我想說：「唔係吓話？」時，饅頭媽竟雀躍說：「幾好喎，夠晒實用！米都唔平o架，就咁話啦！」我無言以對，呆呆的在看着那包泰國香米，問那小生：「這包米有冇得送貨？」他尷尬地說：「對唔住，要自取。」
結果當晚，我買了一台包送貨的洗衣機，並得到一袋不包送貨的大米。走過漫漫長路，好不容易才回到家中，右手手臂痠痛無比，這便是貪心之過。
網址：www.facebook.com/newpapaclub