LEGRIA mini 160度魚眼自拍

不少人喜歡自拍短片擺上網，有啲講化妝、有啲教打機、有啲齋吹水，總之題材層出不窮。若然大家仲用緊Webcam或手機自拍就太Out喇！Canon全新LEGRIA mini迷你攝錄機，外形似足化妝粉盒，翻一翻屏幕便可前拍後拍，加埋160度超廣角鏡頭，以後拍片可以更Free。

自拍好似拎住化妝粉盒咁輕鬆！（設計對白）
售價：$2,480

拍片影相皆宜

LEGRIA mini作為全新創意DV，特別適合YouTuber及喜歡運動的人士使用，其外形設計跟傳統DV截然不同，內置2.7吋觸控屏幕不但可向前翻90度作自拍，亦可向後翻80度作一般攝錄，取景角度夠晒彈性，加上重量只有160g，摺埋個芒似足粉盒一樣，方便放入衫袋或手袋收藏。作為自拍DV，如果鏡頭唔夠Wide，畫面隨時會裁咗半邊面，幸好新機的鏡頭於拍片時可達160度視角，影相時更達170度，有效營造廣闊空間感，啱晒喺狹小的睡房自建拍片天地。若然唔想畫面Wide到變魚眼，大可使用近鏡拍攝模式，它會裁走邊位變形部分，只是相片會降至276萬像素，但就唔會影響影片質素，一樣可攝錄1,920×1,080全高清影像。

多種特效功能

新機主要透過篤芒操作，所以機身設計簡約，實體鍵僅得開關掣、重播和影相用的快門鍵；至於拍片鍵則隱藏於屏幕之中，而機底設有支撐架及腳架孔，無論單手揸住或加裝腳架都咁方便。規格方面，新機採用1,200萬像素CMOS及DIGIC DV 4影像處理器，並內置間隔拍攝、4倍速快鏡等模式，讓各位因應主題拍出不同效果，甚至為影片加入動畫標記、圖案等去豐富畫面。值得一提，新機內置鏡像影片拍攝功能，適用於跳舞或運動練習，可透過左右或上下調轉畫面播放，從而改進自己舞姿和動作。