北京直擊！ 5.1吋MX3 八核魅力

提起水立方，相信大家會諗起游水或跳水比賽，然而自京奧後，場地漸漸變成舉辦大型活動嘅好地方。好似今個禮拜，水立方嘅歡呼聲此起彼落，原來內地手機品牌Meizu（魅族）發表新旗艦機MX3。它不但備有5.1吋大芒，更採用效能強勁嘅八核心處理器，絕對上得大場面！難得係機能超班，機價卻啱Budget，16GB版只需2,499人仔（折約HK$3,162），抵玩過一眾機王。

售價：RMB2,499（16GB）、RMB2,699（32GB）、RMB3,099（64GB）、RMB3,999（128GB）（9月尾抵港）

放大版MX2

一般手機發布會，廠商事前例必賣關子懶神秘，反觀Meizu一反傳統，事前向傳媒發出以MX3外形打造的邀請卡。小記現場試玩真機，外形確實同邀請卡一樣，一體成形配合圓角弧邊，加上機面的輕觸發光鍵，猶如放大版嘅上代MX2。不過機身放大後，其實重量只比上代重咗1g，拎機時唔會太累贅。屏幕則加大至5.1吋，採用New Mode 2技術，播放影片的顏色自然像真。要留意是，新機屏幕唔係大家常見嘅16:9，改用1,800×1,080解像度15:9比例，睇部分高清片時有機會出現黑邊，要扣少少分。

4+4核心設計

發布會上，除咗有各地傳媒外，仲有大量Meizu粉絲「魅友」撐場，佢哋一聽到MX3新功能即刻拍掌兼歡呼，其中講機能部分嘅掌聲特別響。皆因新機內置Samsung Exynos 5410八核心處理器，處理器分別內置一組高效能和一組低功耗嘅四核心處理器，系統會因應工作需求而自動轉換處理器，例如打機會用高效處理器，而待機、上網等Tasks則採用低功耗處理器慳電。另外，新機搭載2GB RAM，機能與八核心版本嘅GALAXY S4睇齊！雖然新機冇得外加記憶卡擴充容量，但廠商除咗提供16GB、32GB、64GB容量外，更會加推128GB版本，點下載Apps都夠用吧？

機面設計簡約，僅設有輕觸Home鍵。

機背備有F2.0大光圈800萬像素鏡頭，現場試相質素唔錯。

Flyme 3.0介面

單計大芒手機，其實市面上有唔少選擇，新機特別以「更好用的大屏手機」作為主題，原來廠商留意到大芒手機一般較難操控，所以喺機身設計以至系統介面着手，例如左右邊框縮窄至2.9mm，機面冇咁闊，單手篤芒自然更容易。此外，Flyme 3.0新介面睇落同舊版分別不大，繼續將Apps放喺主頁，但Icons改為扁平設計，同iOS 7有幾分相似；重點是加入針對大芒機而設嘅功能，好似屏幕底Smartbar會因應用家習慣而自動微調位置，單手可以操作到70%原生瀏覽器功能；聯絡人資料頁面則設有左右兩個撥號鍵，左右手都可輕鬆撥號；加上側掃開Menu等改善操作流暢度，用落好就手。

現場花絮
於水立方搞發布會，證明Meizu喺內地有番咁上下地位。

邀請卡後面貼有NFC晶片，入場認證靠晒佢。

現場有傳媒及「魅友」近千人，座位爆滿！

規格表

制式：GSM三頻、WCDMA

Meizu CEO白永祥親自講解新機功能。	現場展示不銹鋼邊框原材料及製造過程，真材實料喎！	機身弧邊得9.1mm厚度，單手揸住都咁舒服。
拆開機殼可以換SIM卡，但冇得換電池。